Претставници на мигранти, бездомници и затвореници, на кои аргентинскиот понтиф им посвети голем дел од својата црковна кариера, ќе бидат присутни и на погребот на папата Франциск во сабота наутро во Ватикан. Непосредно пред Велигден, сепак, „папата на сиромашните“ дал наредба да донира 200.000 евра од неговата лична сметка како понтиф за поддршка на младите затворени во малолетничките затвори во Рим. Папата навел особено да го поддржат малиот центар за производство на тестенини што успеаја да го создадат. Во меѓувреме, низ целата област околу Ватикан продолжуваат да се поставуваат огромни екрани за оние верници кои не можат да најдат место на плоштадот Свети Петар, да можат да ја гледаат погребната служба за папата Франциск. Паралелно со несмалено темпо продолжува поклонението на верниците во базиликата Свети Петар. До овој момент, се проценува дека околу 20.000 луѓе влегле во храмот и портите на храмот, со оглед на масовната излезност, ќе останат отворени и по полноќ. Папата одлучи да биде погребан во црквата Санта Марија Маџоре во Рим. За време на неговите 12 години како папа, тој често ја посетувал црквата.
Тој таму се молел и рано утрото на 14 март 2013 година, ден откако станал папа. Тој отишол таму да се моли за крај на пандемијата на коронавирус во 2020 година, додека важеше карантинот, но и по абдоменалните операции што ги имаше во 2021 и 2023 година. Тој ја избра истата црква за да се моли пред секое негово патување во странство. Храмот се наоѓа на 4 километри од Ватикан и е една од четирите папски базилики во Рим. Се вели дека таванот од златни листови на црквата бил направен со злато донесено од Новиот свет од страна на славниот морепловец Кристофер Колумбо. Внатре во црквата има икона на Богородица, „Salus Populi Romani“ („За здравјето на римскиот народ“). Вазна со златни рози, донирана од Франциск во 2023 година, седи меѓу свеќниците под сликата.
Во истата црква има статуа на Марија, како кралица на мирот, нарачана од папата Бенедикт XV во 1918 година да побара од Бога да стави крај на Првата светска војна. Историјата на храмот датира од 5 век, жив споменик од претходните времиња на христијанството. Основана е во 432 година, една година по соборот во Ефес кој ја прогласил Марија за Богородица. Таа е единствената базилика во Рим која ја задржува ранохристијанската структура (обично правоаголна градба), иако се направени многу подоцнежни доградби. Легендата, прикажана во мозаик од 13 век на балконот на базиликата, раскажува за чудесен летен снег што се случил на местото каде што подоцна била изградена црквата. Римјаните се собираат на 5 август за да го прослават чудото на Ла Мадона Дела Неве, Богородица на снеговите. Легендата вели дека богата двојка без деца сакала да ги подари своите работи на Дева Марија. Таа им се појавила како привидение и им рекла да изградат црква во нејзина чест каде што ќе се случи чудо. Една ноќ во август 352 година, вели легендата, паднал снег на ридот каде што денес стои базиликата.
Духовната врска на папата со црквата
Во тестаментот Франциск побарал да биде погребан во едноставен гроб, во земја, а не во крипта. Тој побарал на надгробната плоча да биде впишан само зборот „Франциск“. Одлуката на Франциск да биде погребан подалеку од Ватикан ја прекинува традицијата која трае повеќе од еден век. Последниот папа што беше погребан надвор од Ватикан беше Лав XIII во 1903 година. Седум папи и неколку достоинственици се погребани во базиликата, вклучувајќи го и кардиналот Бернард Ло, поранешниот надбискуп на Бостон, познат по својата улога во прикривањето на сексуалната злоупотреба на деца од страна на свештениците. Последниот папа што бил погребан таму бил Климент IX во 1669 година. Во истата црква е погребан и големиот скулптор и архитект Џан Лоренцо Бернини, кој меѓу другото го дизајнирал плоштадот Свети Петар во Ватикан.
