Почитуван заменик-амбасадоре на Обединетото Кралство, г. Даниел Фајлер, Почитуван директор на Форумот за разумни политики, г. Гордан Георгиев, Почитувани пратеници, почитувани присутни, Задоволство и привилегија е да бидам дел од овој свечен настан, кој претставува значајно достигнување не само за пратениците и нивните партии, туку пред сè за Собранието и за граѓаните кои тие ги претставуваат. Да се биде пратеник не е само голема чест, туку и сериозна одговорност. Мандатот што го добиваат со довербата од граѓаните бара знаење, трпение, интегритет и способност да се слушнат и оние што размислуваат поинаку. Затоа, кога еден пратеник ќе одлучи да ги унапредува своите интелектуални и политички капацитети со цел да го подигне квалитетот на претставувањето, тоа за мене претставува благороден и визионерски чин.
Во тој контекст, уверен сум дека Академијата за пратеници не претставува само програма за градење и развој на капацитетите на пратениците, туку во својата суштина е стратешка инвестиција во парламентаризмот: во квалитетот, функционалноста и подобрувањето на политичката култура во Собранието. Дури и во време кога политичкиот речник често е затруен со раздорна, навредлива и поларизирачка реторика, учеството на пратениците во оваа академија претставува искра на надеж. Таа нè потсетува дека е возможно и неопходно да изградиме нова политичка сцена: со помудри и похумани политичари кои ја ценат дебатата, ги почитуваат процедурите и ја негуваат меѓусебната почит. Цврсто верувам дека токму тоа ѝ е потребно на денешната политика: нов дух што ја нагласува идејата, а не партиската боја; дијалогот, а не конфронтацијата; решението, а не блокадата.
Преку оваа Aкадемија, создадена е заедничка основа каде што може да се негува соработка, да се зајакне комуникацијата и да се произведат конкретни резултати за општото добро, без оглед на идеолошките разлики. Како претседател на Собранието, верувам дека оваа институција има морална и демократска обврска да промовира соработка, почит, толеранција и достоинствено претставување. Ова не го велам случајно, туку убеден сум дека без искрен дијалог и соработка надвор од линиите на поделба, секоја реформа останува површна, а секој закон недоволен. Во таа насока, проекти како оваа Академија се камен-темелник на визијата за изградба на Собрание кое им служи на граѓаните со професионализам и одговорност.
Од таа причина, сакам да изразам посебна благодарност до Владата на Обединетото Кралство за поддршката на оваа програма, како и да му се заблагодарам на Форумот за разумни политики, кој со својата исклучителна и креативна посветеност изгради програма што нуди знаење, развој, соработка и голема конструктивност. Тоа е причината зошто овој проект ја има мојата почит и заслужува највисоко институционално признание. Почитувани пратеници, На крајот, сакам да ви честитам за посветеноста што ја покажавте. Посакувам вашето искуство од оваа академија да се одрази во вашата секојдневна работа, во комисиите, во собраниската сала и во комуникацијата со граѓаните. Зачувајте го и зајакнете го конструктивниот дух што ја одбележа оваа Академија, бидејќи „Во политиката, зрелоста не значи само да се имаат ставови – туку да се знае како да се споделат, без притоа да се урнат мостовите на комуникација“. Ви благодарам!
