Подготвителната седница за Законот за јазиците е закажана за 19 јуни, а проценките на претседателот на Уставниот суд, Дарко Костадиновски се дека одлука ќе има после локалните избори наесен за да се избегне етнизација и политизација.
– Моја проценка е дека конечната одлука ќе биде донесена после изборите. Да не се случеше трагедијата, подготвителната седница ќе беше веќе завршена, и за во јуни некаде природно би дошло носењето на одлуката. После подготвителната седница ќе ни требаат месец, месец и пол, два, за да се подготви нов реферат, за да се сублимираат сите мислења на сите учесници – изјави Костадиновски во гостување на емисијата „Трилинг“. Претседателот на Уставниот суд вели дека никој не треба да стравува од одлуките на судот, зашто не станува збор за напад на нечии права. Тој оценува дека непотребно се создаде голема фама со давање на етнички и политички димензии за постапувањето на судот. По изјавата на Костадиновски на Фејсбук реагираше поранешниот министер за надворешни работи и потпретседател на Демократската унија за интеграција Бујар Османи, се сомнева дека локалните избори во октомври ќе бидат претворени во референдум за албанскиот јазик. Според Османи, одамна се зборува дека Владата му наредила на Уставниот суд веднаш по октомвриските избори да го укине Законот за јазици, за, како што вели тој, да не му наштети на нивниот албански проект.
-Изјавата на претседателот на Уставниот суд, дека одлуката ќе биде донесена по изборите, само го потврдува ова. Оваа одлука ги претвора следните избори во референдум за албанскиот јазик и за еднаквост во државата – напиша Османи. Од владејачката Вреди пак реагираат дека ДУИ е разочарана бидејќи им пропадна планот да го поништат Законот за јазиците и со тоа да ја дестабилизираат државата.
-Планот на Али Ахмети и Бујар Османи, преку судии именувани од нив во Уставниот суд, да го загрозат албанскиот јазик во Република Северна Македонија и да ја дестабилизираат земјата, пропадна пред да земе замав. ДУИ беше подготвена да го жртвува албанскиот јазик само за една ниска цел: Да се врати на власт по секоја цена. Не грижете се, албанскиот јазик не е предмет на преговори! Вреди нема да дозволи ниту еден чекор назад во правата на Албанците! Лагите завршија – реагираа од Вреди.
