Во Општина Неготино неодамна беа доделени вредносни ваучери од 7.000 денари за новороденчиња, еднократна парична помош која општината ја доделува повеќе од три години како симболична поддршка за семејствата кои добиле принова. За првото тромесечје од годината, односно за месеците јануари, февруари и март, биле доделени 34 ваучери, односно во општината се родиле само 34 бебиња. Ако се земат во предвид податоците за наталитетот во Неготино од пред петнаесеттина години, кога годишно се раѓаа и над 200 бебиња во општината, не може, а да не забележи дека станува збор за драстични бројки, кога е во прашање мала општина со околу 19.000 жители. Според податоци објавени од страна на Државниот завод за статистика, пред околу 10 месеци, а кои се однесуваат за 2023 година, во Неготино се родиле 139 бебиња, од кои едно било мртвородено. Од живородените, 69 биле женски, и исто толку машки. Истата 2023 година, во општината починале 201 лице, од кои 120 машки и 81 женско лице. Како споредба, во 2009 година во Неготино починале 172 лица, од кои 91 машки и 81 женски.
Во 2009 година пак, се родиле 202 бебиња во општината, од кои 200 живородени, и тоа 103 машки и 97 женски.
Околу тоа дека населението во општината се намалува од година во година, доволно зборува и податокот што во средното општинско училиште веќе неколку години наназад учениците учат во една смена. Во минатото наставата се одвиваше во две смени, со преполни училници, а денес сликите се сосема поинакви. Градот посебно се празни за време на лето, кога голем број на млади лица, но и возрасни семејни луѓе заминуваат на сезонска работа во странство, па локалните приватници, посебно во угостителскиот сектор кубурат за работна сила. Околу тоа колку точно неготинци заминуваат на сезонска работа, нема официјални податоци, но според минатогодишните информации уште во првите три месеци од годината се започнало со масовно издавање на уверенија за неосудуваност, кои на граѓаните им се потребни за вработување во странство. Нема ниту официјални податоци околу тоа колку семејства заминале на подолг престој во странство, но речиси во секоја зграда, односно во секоја улица има затворени домови, чии сопственици заминале во потрага по подобар живот во некоја европска земја.
Градот своевремено познат по виновата лоза се празни, а од многуте лозја останаа само празни полиња. Младите се потешко се одлучуваат да останат во родното огниште и да се занимаваат со лозарството кое полека изумира, а пак многу лозари последните години ги продадоа лозјата на фирми кои планираат да градат фотоволтаични централи или пак хали за производство од областа на лесната индустрија. Генерално, во цела Македонија, наталитетот е во пад. Според податоците на Државниот завод за статистика, во 2023 година, во Република Северна Македонија вкупно се родени 16.859 деца, од кои живородени се 16.737, а мртвородени 122. Бројот на живородените деца во 2023, во споредба со претходната година, е намален за 7,4 проценти. Според податоците на Државниот завод за статистика пак, во земјава бројот на умрените во 2023 година изнесува 20.187 лица, односно разликата помеѓу починати и родени изнесува колку целокупно население на една помала општина.
Вики Клинчарова
