Криминалците се шетаа слободно, државата молчеше, а граѓаните живееја со чувство на немоќ. Имаше време кога институциите се користеа како алатка за лични и политички интереси, а не за правда. Пораките „ќе средиме” и „ќе се јавам” беа погласни од законот. Но тоа време е завршено, порача премиерот Христијан Мицкоски. Денес, ја одбележуваме не само историјата на македонската полиција, туку и нејзината жива мисија – да биде штит на граѓаните, чувар на правдата и симбол на државноста, порача премиерот Христијан Мицкоски. – Полицијата не е само униформа и службена должност. Полицијата е човек. Човек што станува порано од сите, излегува на терен и се соочува со ризици од кои сите ние се обидуваме да се заштитиме. Тој човек – полицаецот – не размислува само за својата безбедност, туку и за нашата. „Храброста не е отсуство на страв, туку победа над него”, рекол Нелсон Мандела. А храброста на нашите полицајци се покажува секој ден – во секоја интервенција, во секоја патрола, во секоја жртва дадена за да останеме сигурни. Не можеме, а да не се поклониме пред споменот на оние кои својата работа ја запечатија со животот. Нивните имиња се врежани во историјата, но нивните дела живеат во секој наш безбеден ден. Да не заборавиме: зад секоја значка стои семејство кое чека, се моли и се надева дека нивниот најблизок ќе се врати дома – порача Мицкоски. Се сеќаваме – и не смееме да заборавиме – како изгледаше нашето секојдневие пред неколку години, додаде тој.
– Вашата мисија е света – да чувате поредок, но и да вратите доверба кај народот. „Кога правдата замолчува, неправдата станува гласна”, рекол еден мудар човек. Но со вас – со вашата работа, посветеност и пожртвуваност – неправдата останува без простор. Таа се повлекува пред чесната, решителна и модерна полиција. Безбедноста не е само статистика. Таа е чувство. Таа е кога родител без страв го пушта своето дете во училиште. Кога една мајка спокојно се враќа дома во доцните часови. Кога секој граѓанин знае дека државата стои зад него. Тоа чувство ни го подарувате вие – полицајците. Затоа, со полни срца, ви честитаме. Среќен ден на македонската полиција! Да ви се заблагодариме за секоја ноќ без инцидент, за секој спасен живот, за секој криминалец што одговара за своите дела. Ви посакувам здравје, сила и секогаш – безбеден повраток дома. Бог да ве благослови и Бог да ја благослови нашата Македонија. Чувајте ја Македонија! – порача премиерот.
