Шведската безбедносна служба (САПО) уапси висок шведски дипломат под сомнение за шпионажа, објави денес шведскиот јавен радиодифузен сервис СВТ, повикувајќи се на неименувани извори. Агенцијата објави дека уапсила лице под сомнение за шпионажа по операцијата во областа на Стокхолм во последните денови, но одби да даде дополнителни информации. „Вистина е дека ова е случај каде што постои сомневање за шпионажа. Едно лице е приведено“, изјави портпаролката на САПО Карин Луц, за Ројтерс.
Телевизијата СВТ објави дека осомничениот служел во неколку амбасади низ целиот свет и дека случајот го презел одделот за национална безбедност на шведското јавно обвинителство. Министерот за правда Гунар Штромер изјави за СВТ дека владата е свесна и дека постојат „основано сомнение“ лицето во притвор да се смета за осомничено за шпионажа. „Истрагата мора да се спроведе и не сакам да ја попречувам“, рече Штромер во изјава за СВТ. Антон Странд, адвокатот назначен за бранител на осомничениот, одби да коментира.
Шведска во последниве години се соочи со неколку случаи на шпионажа кои беа широко публицитетирани од медиумите. Во јануари 2023 година, поранешен шведски разузнавачки агент беше осуден на доживотен затвор за шпионажа за Русија. На 2 септември истата година, еден руско-шведски државјанин беше суден за пренесување на западни технологии во руската армија. Судот во Стокхолм заклучи дека тој извезувал технологија во Русија, но пресуди дека неговите постапки не претставуваат собирање разузнавачки информации.
Во февруари 2024 година, Шведската агенција за поддршка на верските заедници го укина финансирањето за Руската православна црква во Шведска откако Сапо предупреди дека Црквата се користи за разузнавачки активности. Во нивната годишна проценка, објавена во март, разузнавачките агенции ги идентификуваа Русија, Кина и Иран како главни актери кои спроведуваат активности за собирање разузнавачки информации насочени кон скандинавската земја.
