Од Синдикатот на АД „Пошта на Македонија“ за „Слободен печат“ велат дека состојбата со вработените што разнесуваат пошта и натаму е влошена, постојните си заминуваат, а нема нови вработувања. Поштата примила најмногу рекламации за препорачани писма, а корисниците рекламирале за пречекорување на рокот за достава и за изгубени препорачани писма. Писма, пакети, фактури за комунални сметки со месеци не добиваат граѓаните, кои се жалат дека во изминатиов период не виделе поштар да се приближи до нивниот дом. Тие реагираат дека особено се плашат дека ако не добијат сметка за струја, за вода или за некоја друга услуга, ќе бидат дадени на извршител што непотребно ќе им зголеми трошоците. Дел од нив трчаат до пунктовите на ЕСМ, Водовод или Топлификација за да извадат дупликат сметка и со време да си ја платат.
Како што веќе објавивме лани во споредба со 2023 година, вкупно поднесените приговори до РКЕ се зголемени за 49,4 отсто, а дури 42,7 отсто од нив се однесуваат за недоставена фактура, висина на фактура, начин на пресметка, висина на долг, пресметана камата, тужби, промена на потрошувач, промена на начин на плаќање, плаќање на рати, спогодби и двојно платени сметки како и сл. Агенцијата за пошти во својот лански Извештај за работата пак констатира дека кај давателот на универзалната услуга (Пошта) има намалување на рекламациите за околу 30 отсто. – Давателот на универзалната услуга има најмногу рекламации за препорачани писма – 100 проценти, а корисниците рекламирале за пречекорување на рокот за достава и за изгубени препорачани писма – пишува во Извештајот.
Од Синдикатот на АД „Пошта на Македонија“ за „Слободен печат“ велат дека состојбата со вработените што разнесуваат писма и натаму е влошена, постојните си заминуваат, а нема нови вработувања. – Свесни сме за овие проблеми, но имаме сè помалку поштари. Старосната структура е таква што 65 отсто од вработените се неколку години пред пензија, поштарите работат за минималец и секојдневно на лично барање ја напуштаат компанијата. Се крпиме со 250 договорци, кои работат без здравствено и пензиско осигурување. Најлошо е во скопски Аеродром, каде што неколку региони ни се празни, односно немаме поштари. Се снаоѓаме со позајмици од другите пошти, но тоа е недоволно со оглед на капацитетот – посочува Боро Велигденов, претседател на синдикалната организација во АД Пошта.
Тој тврди дека компанијата има и ресурси и капацитети, ама тие недоволно се користат. Според Извештајот на Агенцијата за пошти, на крајот од 2024 година во Пошта имало 1.676 вработени, од кои 469 вработени поштари и 252 договорни пошторазнесувачи. – Нови вработувања не се предвидени, така што сериозно мора да пристапиме кон внатрешна прераспределба. Работната група веќе работи на новата систематизација, оти имаме повеќе административци отколку технички кадар – додава Велигденов. Министерот за транспорт и врски Александар Николоски пред крајот на минатата година рече дека работат на реорганизација и реформи во Македонска пошта, а резултатите на новото раководство ќе бидат забележани по Нова година?! Новото раководство од Владата побара 5 милиони евра за излез од финансиската криза. Засега не е предвидена приватизација на Пошта, додека физибилити студијата за која се потрошени 800 илјади евра е неупотреблива. Инаку, според ревизорскиот извештај, Пошта од 2017 година е континуирано во загуба, а најголема била во 2022 година – 3,7 милиони евра.
