Словачкиот премиер Роберт Фицо изјави денес дека атмосферата во словачкото општество е сè понапната и дека не исклучува нов напад врз него, по обидот за атентат на 15 мај минатата година, во кој тој доби тешки, животозагрозувачки повреди. „Имаше разни обиди да нè затворат. Без разлика дали стануваше збор за дискредитација, бев обвинет четири пати, бев на еден сантиметар од затвор. И покрај ова, ги добивме изборите. Некои луѓе тешко ги поднесуваат резултатите од демократските парламентарни избори, па атмосферата постепено се развиваше сè додека некој не рече дека ќе ги земе работите во свои раце и ќе ги реши“, рече Фицо во интервју за словачката телевизија TA3. Фицо повтори дека, според познатите информации, напаѓачот е лице блиско до опозициската партија Демократи и обвини одредени медиуми во Словачка за ширење омраза.
„Со свои очи видов во една телевизиска емисија како уредникот го праша соговорникот: „Значи, Фицо треба да биде убиен?“, а тој одговори потврдно: „Фицо треба да биде убиен“. Ова се невидени работи“, нагласи тој. Фико предупреди дека, според извештајот на безбедносните сили, уште еден напад е неизбежен. „Сите безбедносни сили нè предупредуваат дека сме многу блиску до уште еден напад врз јавен службеник. И што е полошо – многу блиску до некаков вид јавен конфликт , во кој една група демонстранти би можела да нападне друга. Ако не почнеме да преземаме практични чекори, запишете го тоа – ќе има уште еден атентат. Апсолутно сум убеден во тоа “, предупреди премиерот на Словачка. Тој исто така изјави дека го предвидел минатогодишниот обид за атентат и дека постојано ги предупредувал своите колеги во владата за таква можност
