Иако родителите на загинатите во трагедијата што се случи во дискотеката во Кочани првично ја одбија поканата за средба од Кабинетот на премиерот Христијан Мицкоски, тој вчера во говорот на одбележувањето на годишната конференција на Унијата на жени на ВМРО – ДПМНЕ откри дека минатата недела се сретнал со роднините на настраданите. И вчера, но и во денешниот одговор од Владата за „Слободен печат“, не прецизираат дали премиерот се сретнал со семејствата на сите загинати во несреќата, единствено откриваат дека средбата не била најавено во медиумите на барање на семејствата. -Ве информираме дека на барање на семејствата, средбата не беше најавена во медиумите. Како Влада имаме обврска да ги почитуваме барањата на сите граѓани кои остваруваат средба со премиерот и од таа причина остануваме на веќе изнесените ставови на претседателот на Владата. Ние остануваме во постојан контакт со сите засегнати од трагедијата, но воедно нема да подлегнуваме на желбата на неколкумина да прават политички злоупотреби од оваа трагедија – велат од Владата за „Слободен печат“.
Мицкоски во говорот вчера порача дека многу нечовечки и безобразно, некрофилски се злоупотребувала кочанската трагедија. -Тоа можев и да го чујам од роднините на настраданите кои минатата недела дојдоа кај мене во просториите на Владата. Со огромна почит кон тие луѓе и отворен разговор, споделувајќи ја заедничката болка заради трагедијата што се случи, дискутиравме за повеќе аспекти и за она што е во надлежност на Владата и можности да се помогне во расчистување на случајот и да им се помогне на семејствата во справување со тагата и предизвиците на животот во една ваква ситуација. Оваа трагедија не смее да се злоупотребува, и сите кои имаат своја вина која придонела да се случи ваква трагедија мора да одговараат. Системот мора да се менува и да има правда, и во тоа заеднички сме одлучни и ние сме подготвени заеднички да продолжиме да работиме и да комуницираме, да помагаме за сè поврзано со нив. Тоа беше исклучително тешка средба за мене, разговарајќи со нив, душата ми плачеше, а стисокот на нивната рака ми е потпора и мене во нашата заедничка борба за доброто на оваа наша заедничка татковина – рече Мицкоски.
Тој најави дека во периодот што ќе следи ќе има редовни состаноци со родителите, во Скопје, а најави дека и ќе оди во Кочани доколку некои од нив не можат да дојдат. -Оние коишто, од оправдани причини, не сакаат, ќе појдам јас кај нив. Периодов и јас лично и Владата, стоиме на располагање, сè што е потребно да направиме и да не дозволиме, оние политички глодари и некрофили да ја злоупотребуваат политички оваа трагедија којашто се случи. Не смееме да дозволиме политичка злоупотреба – рече Мицкоски во говорот. Во саботата се одржа шестиот Марш на ангелите во Кочани, кој за разлика од претходните помина во целосен молк и без никакви изјави од родителите. Овој протест беше поброен откако движењето „Кој е следен“ со организиран превоз им даде поддршка на родителите, па колоната која маршираше низ Кочани беше долга, но тивка. По маршот таткото на загинатиот Андреј Стојанов, кој бил програмер и работел во Скопје, во изјава за „Слободен печат“ рече дека овој марш поминал во молк бидејќи кога некој ќе кажел нешто, веднаш се правеле партиски „математики“.
-Во молк, па бидејќи разни математики испаѓаат, кога некој ќе каже нешто испаѓа дека некој е за власта, некој е против власта, некој партиски бил определен, некој не бил партиски определен. Власта сама треба да биде свесна по оваа катастрофа што е направена без оружје, ова масовно убиство без војна, тоа Хитлер не го правел во логорите и Американците и кога фрлале атомска бомба на Хирошима – рече тој. На прашањето за средба со премиерот, тој само кажа дека има разногласие меѓу родителите. -Некои сакаат да одат таму, некои тој да дојде тука и средбите тие се. Сите ветуваат дека ќе работат професионално на случајот, секој кажува дека работата е сериозно сфатена, а од друга страна никој не ја сфаќаше ситуацијата сериозно, само се гледаше митото, корупцијата, парите. Каде била државата во тоа време – вели тој. Во истрагата што ја води Обвинителството осомничени се 59 лица, а за еден месец се очекува да биде покренато и обвинение за трагедијата.
