„Почитуван ректор и раководство на Меѓународниот балкански универзитет,
Драги студенти, Почитувани претставници на медиумите и други гости,
Често се вели дека „само здравјето и знаењето никогаш не се доволни“. И тоа е апсолутно точно. И во здравството и во образованието потребно е постојано вложување – за да се заштити здравјето на граѓаните преку квалитетен медицински кадар, што работи според најдобрите светски практики и со најсовремена медицинска опрема. Токму тоа го правиме. Со меморандумот за соработка што денеска го потпишавме помеѓу Санте Плус Групацијата и Меѓународниот балкански универзитет, го отвараме патот за нова генерација лекари и медицински професионалци, обучени за новите генерациии на медицинските услуги.
Да не ги испраќаме нашите пациенти и талентирани млади лекари во странство. Да ги донесеме глобалните стандарди тука, во Република Северна Македонија. Веќе го правиме тоа – со бенефит и за граѓаните и за младите луѓе, кои ја гледаат својата иднина во родната земја.Се договоривме, студентите од медицинската програма на Универзитетот, да имаат предавања од врвни, почитувани лекари од Санте Плус Групацијата. Оваа соработка отвора врата за најдобрите дипломирани студенти да започнат со својата кариера веднаш по дипломирањето, преку вработување во некоја од болниците на Санте Плус Групацијата.
Би сакал да нагласам дека медицинската програма на Универзитетот е фокусирана на гинекологија. А, ние досега отворивме четири болници низ државата. Помеѓу нив, Санте Плус 1 е веќе препознаена како лидер во гинеколошките услуги, особено во третманот на неплодност, на регионално ниво. Применуваме современа гинекологија и акушерство, со високо квалификуван медицински кадар и веќе постигнуваме меѓу најдобрите резултати за Ин Витро методот, во регионот.
Во рамките на Санте Плус Групацијата во државава, Европската очна болница е исто така препознаена како регионален лидер во лекувањето на очни болести, со врвни доктори од Северна Македонија и од Турција. Дополнително, постојат уште две болници, опремени со навистина модерна дијагностичка опрема, којашто им овозможува на граѓаните пристап до современа медицина – особено во превентивната грижа. Затоа, драги студенти, идни лекари и медицински професионалци – вратите на Санте Плус Групацијата се отворени за вас, затоа што талентираните и умни млади луѓе се иднината на Република Северна Македонија, како и на светот.
Чест е да се соработува со Меѓународниот балкански универзитет, како интернационална образовна институција, особено што таму има млади луѓе од целиот Балкан и пошироко – од над 20 земји. Тука сум да порачам дека Санте Плус Групацијата е подготвена да инвестира во младите и во академското знаење – за да обезбедиме – и здравје и знаење, за здрави и сигурни генерации, денес и во иднина“.
