Јапонскиот министер за земјоделство поднесе оставка откако изјави дека никогаш не купува ориз бидејќи го добива бесплатно – забелешка што предизвика гнев кај јавноста во земјата што се соочува со зголемување на цените на храната, објави британскиот „Гардијан“. Оставката на Таку Ето го зголеми притисокот врз премиерот Шигеру Ишиба, чиј неуспех да ги ограничи зголемените цени на оризот и да се справи со пошироката криза со трошоците за живот ги налути гласачите пред изборите за горниот дом на парламентот во јули.
„Тукушто му ја поднесов мојата оставка на премиерот Ишиба“, изјави Ето за новинарите. Тој беше повикан да поднесе оставка откако рече дека никогаш не морал да купува ориз, туку се потпира на подароци од поддржувачи. Ето првично сочувствуваше со „тешкотиите“ што ги доживуваат потрошувачите откако владата ослободи околу 300.000 тони ориз од резервите за итни случаи претходно оваа година со надеж дека ќе ги намали цените. Но, зборувајќи на собирање средства минатиот викенд, Ето рече дека „никогаш не купил ориз за себе затоа што моите поддржувачи ми донираат толку многу што практично можам да го продадам“. Коментарот на Ето ги налути потрошувачите, кои мора да платат речиси двојно за пакет ориз во споредба со пред една година, според податоците објавени во април.
Неколку фактори се сметаат за причина за недостигот на ориз во Јапонија, вклучувајќи ја слабата жетва поради жешкото време во 2023 година и паничното купување предизвикано од предупредувањето за „мегаземјотрес“ во 2024 година, пренесува Кликс.ба. Се верува дека и трговците на големо и дистрибутерите складираат ориз во очекување на понатамошни недостатоци. Тековната криза со оризот и растечките сметки за храна и енергија во домаќинствата ја намалија популарноста на владата на Ишиба. Просечната цена на оризот продаден во супермаркетите во неделата до 11 мај достигна рекордни 4.268 јени (29 долари) за 5 килограми, што е зголемување во однос на 4.214 јени претходната недела и околу двојно повисока цена од пред една година. Во април, Јапонија увезе ориз од Јужна Кореја за прв пат по четврт век, во обид да одговори на растечкиот гнев на потрошувачите.
