Собранието денеска ќе ги одржи продолженијата на 52. и 41. седница. На дневен ред на 52. седница се Дополнетиот предлог на закон за изменување и дополнување на Законот за локална самоуправа, во второ читање, Предлог на закон за изменување на Законот за културата, по скратена постапка, како и Предлогот на законот за изменување и дополнување на Законот за задолжително капитално финансирано пензиско осигурување, по скратена постапка. Законот за локална самоуправа беше даден бидејќи граѓаните се незадоволни од работата на сегашната градоначалничка на Скопје, Данела Арсовска, а немаат законска можност да ја сменат се додека трае нејзиниот мандат. Сепак, овие измени ќе важат за новите градоначалници. Министерот за локална самоуправа Златко Перински посочи дека измените се направени низ инклузивен процес, а во изработката билe вклучени домашни и меѓународни експерти. Клучните измени се однесуваат на транспаретноста и отчетноста на градоначалниците, советите и службите во општините, а се насочени и кон спречувањето на корупцијата и дигитализацијата на општините услуги.
„Како основа во процесот на креирање на решенијата го земаме извештајот на Венецијанската комисија на Советот на Европа од 2019 година насловен како Извештај за отповикување на градоначалници и локални избрани претставници. Овој документ којшто е усвоен на 65-та седница на Советот за демократски избори и на 119. пленарна сесија на Комисијата претставува релевантен документ со стандарди кои го одразуваат европскиот пристап кон прашањето за локалната демократија. Токму ова е еден од најголемите предизвици на актуелното законско решение, а тоа е отсуството на механизам за отчетност на градоначалниците. Иако тие се избираат директно од граѓаните, актуелниот закон не предвидува начин за покренување на постапка за нивна доверба или отповикување пред завршување на нивиот мандат“, рече Перински.
Во рамки на 41. седница пратениците треба да ги ратификуваат Протоколот за изменување и дополнување на Конвенцијата за кривичните дела и некои други акти извршени во воздухоплови, Протоколот за дополнување на Конвенцијата за сузбивање на незаконито грабнување на воздухоплови, Конвенција за спречување на незаконски дејствија поврзани со меѓународното цивилно воздухопловство, Факултативниот протокол на Конвенцијата за правата на детето за постапка по претставки како и измената на Конвенцијата за оцена на влијанието врз животната средина во прекуграничен контекст усвоен во Софија, на 27 февруари 2001 година и втората измена на Конвенцијата за оцена на влијанието врз животната средина во прекуграничен контекст усвоен во Цавтат, на 4 јуни 2004 година. На дневен ред на оваа седница е и Предлог на закон за изменување на Законот за доброволно капитално финансирано пензиско осигурување, во прво читање. Седница ќе одржи и Комисијата за здравство на која треба да бидат соопштени заклучоците од Надзорната расправа на тема: „Ефектите од аерозагадувањето во Скопје и во другите градови врз здравјето на луѓето и мерките што се преземаат за заштита на јавното здравје“.
