Тања Стојанова од кавадаречко, пред два дена била со својот тригодишен син Блаже и со останатите три деца дома. Утринава кога ја побаравме, таа беше на гробишта. Нејзиниот Блаже почина на пат кон Скопје завчера, во нејзините раце. И Тања и сопругот Томе бараат адвокати што бесплатно би ги застапувале во нивниот обид да докажат дека во кавадаречката болница каде го однеле детето, не им било помогнато и тоа од докторка со конкретно име и презиме која ја обвинуваат за лоша и неадекватна проценка на здравствената состојба на малечкиот.
-Точно е дека Блаже имаше Даунов синдром и не напредуваше со телесната тежина. Имаше 3 килограми и 680 грама. Но, тоа не значи дека треба да се остави без третман. Кога се разбудив ноќта, видов дека ја плукнал цуцлата, а исплукал и крв. Веднаш со сопругот отидовме во болницата во Кавадарци. Таму им кажавме дека е без енергија, истоштен, дека плукна крв која можеше да се види на панталоните. Го прегледаа со слушалка, со дрвено стапче во устата и му измерија температура. Потоа ми рекоа дека Блаже е добар. Побаравме упат за Скопје и ни дадоа, но кога побаравме амбулантско возило за превоз до Скопје, докторката што беше дежурна ни рече дека нема основ да ни издаде возило за Скопје и да се снаоѓаме сами, сме можеле да одиме со автобус до Скопје, а рече дека била сигурна оти Блаже ќе го издржел патувањето. Ова се случуваше во 3 часот ноќта. Сабајлето имавме најдено превоз и Блаже не го издржа патувањето до Скопје. Ми умре на раце на патарината пред Скопје, изјави за „Слободен печат“ Тања Стојанова, мајка на детето. На нашето прашање дали ги информирала докторите во кавадаречката болница дека детето исплукало крв, таа одговори потврдно, но тоа не било сфатено како сериозен симптом и не било направено никакво снимање за да се утврди причинителот на крвавењето.
-Кога стигнав на Детска клиника во Скопје, со мојот мртов син во рацете, сестрите почнаа да се крстат, дали Кавадарци стигна до тоа ниво, да не дава санитетско возило за превоз, туку сами да не пушта да се снаоѓаме, додаде Стојанова. Државниот санитарен и здравствен инспекторат (ДСЗИ) ќе изврши вонреден инспекциски надзор во Општата болница во Кавадарци и на Детска клиника во Скопје, во врска со смртта на тригодишното дете од Кавадарци. Мајката и таткото за „Слободен печат“ велат дека ноќта на прегледот, констатирана му била сатурација од 100 проценти, пулс од над 50 и немало треска и телесна температура. Се обидовме да ја контактираме директорката на болницата но таа не одговара на нашите пораки. Болницата во Кавадарци најави дека ќе излезе со писмено соопштение во врска со случајот. Врз детето е извршена обдукција. Од Детската Клиника потврдија дека кај нив детето е донесено откако претходно настапила смрт.
-Кај нас детето е донесено без знаци на живот. Полицијата понатаму ја презеде постапката и има обдукција по наредба на Обвинителството, рече за „Слободен печат“ директорот на Клиниката за детски болести во Скопје доктор Реџеп Мемеди. Министерството за внатрешни работи во билтенот вчера информираше дека во службен разговор 36-годишната мајка на детето Тања Стојанова, изјавила дека околу 3 часот ноќта го однела во Општа болница Кавадарци, од каде ги упатиле во Клиниката за детски болести при Комплекс клиники „Мајка Тереза“ Скопје, каде што во 8 часот и 45 минути била констатирана смрт. По наредба на јавен обвинител телото на починатото дете е предадено на обдукција, соопшти МВР.
