По четири децении тага, неизвесност и копнеж, Мејрема Каришик од Нови Пазар конечно го прегрна својот син Фарук, кого никогаш претходно немала можност да го запознае. Спојувањето на мајката и синот, разделени 40 години, се случи минатата недела во селото Трнава, благодарение на напорите на хуманитарот Хидо Муратовиќ. Емотивната сцена, снимена со камера, остави силен впечаток не само кај присутните, туку и кај илјадници луѓе кои ја следеа приказната преку медиумите и социјалните мрежи, пренесува Н1.
Приказната на Мејрема Каришик првпат стана јавна пред нешто повеќе од два месеци. Во трогателен извештај, таа раскажа дека нејзиниот син бил одземен од неа кратко време по неговото раѓање додека живеела на Косово, каде што се омажила како млада. Недолго по породувањето, Мејрема била насилно одвоена од детето и исфрлена од семејниот дом – без никаква можност повторно да го сретне новороденчето.
„Со години живеев само со една желба – да дознаам дали мојот син е жив и да го погледнам во очи, барем еднаш во животот“, рече Мејрема, не криејќи ги своите емоции.
Потрагата по Фарук започнала благодарение на познатиот хуманитарец Хиде Муратовиќ. Тој и неговиот тим собраа информации, поврзаа контакти и со помош на добри луѓе го пронајдоа Фарук, кој сега живее во странство. Откако ја дозна вистината за неговото потекло, Фарук не се двоумеше – веднаш реши да дојде во Санџак за да се сретне со својата мајка. Мејрема и Фарук сега имаат можност да надоместат за изгубеното – години што никој не може да ги врати, но и можност да започнат ново поглавје како мајка и син.
