Научниците за првпат открија пештера на Месечината која е длабока најмалку 100 метри и би можела да биде идеално место за изградба на постојана база. Според гледиштето на истражувачите, објавено во списанието „Nature Astronomy“, тоа е само една од веројатно стоте пештери скриени во „подземниот, неоткриен свет“ на Месечината, пренесува Ал Џазира Балканс.
Хелен Шарман, првата британска астронаутка која патувала во вселената, вели дека новооткриената пештера изгледа како добро место за база и дека луѓето потенцијално би можеле да живеат во пештери на Месечината за 20-30 години. Според неа, пештерата е толку длабока што астронаутите можеби ќе треба да се спуштат со јаже и да користат „џет пакети или лифт“ за да излезат.
Научниците Лоренцо Бруцоне и Леонардо Карер од Универзитетот во Тренто во Италија ја нашле пештерата со помош на радар за да го пробијат отворот на карпеста рамнина наречена „Mare Tranquillitatis“. Тоа е видливо со голо око од Земјата, а исто така е местото каде Аполо 11 слета во 1969 година.
Според нив, пештерата има отвор на површината на Месечината, што води до вертикални и надвиснати ѕидови и наведнат под што може да се протега подлабоко под земја. Таа е формирана пред неколку милиони или милијарди години кога лавата течела низ Месечината, создавајќи тунел низ карпата. Најблискиот еквивалент на Земјата би биле вулканските пештери во Ланзароте, Шпанија, објасни Карер, додавајќи дека истражувачите ги посетиле тие пештери како дел од нивната работа.
„И животот на Земјата започнал во пештери, па логично е луѓето да живеат во нив на Месечината. Кога ќе дојдете до овие откритија и ќе ги погледнете тие слики, сфаќате дека сте првиот човек во историјата на човештвото што го видел ова“, истакна Карер. Пештерата сè уште не е целосно истражена, но истражувачите се надеваат дека радарите, камерите или дури и роботите кои продираат на земја би можеле да се користат за нејзино мапирање.
