Тоа е, се разбира, лично остварување, но морам да ти кажам дека така охрабрувачки делува врз мене, а верувам и врз сите што малку од малку мислат во овие лоши времиња. Ги обновува нашите надежи затрупани од сомнежи, резигнации и немоќ. Во вакви пригодни моменти знаеме да претераме во пофалбите, но јас сакам да те уверам дека нема ништо пригодно ако кажам дека ти си најистакнат претставник на загрозениот вид на големите интелектуалци кои го држат фронтот на пристојноста, нормалноста и модерноста пред офанзивата на просташтвото и неверојатната глупост што не загрозува како личности, заедница и култура.
