Сите оние што си присвоија јавен простор повеќе од дозволеното, затворија премини и го попречуваат движењето на луѓето, сега со право стравуваат дека терасите во кои вложиле многу пари, ќе им бидат урнати. Вакво нешто веќе се случи во Струмица, а во Скопје градоначалниците сè уште ги толерираат и им даваат време на угостителите самите да си ги отстранат неправилностите.
Годинава за првпат угостителите што не се придржуваат до елаборатите што ги доставиле за одобрение за урбана опрема, не добиваат дозволи за поставување маси и столчиња пред објектите. Популарните летни тераси, кои во изминатите години по донесувањето на законот со кој се забрани пушење во затворен простор почнаа да функционираат цела година и притоа се доградија, проширија и застаклија за да можат да работат и преку зима, по ужасната трагедија во Кочани, подложат на строги контроли. Па, така, сите оние што си присвоија јавен простор повеќе од дозволеното, затворија премини и го попречуваат движењето на луѓето, сега со право стравуваат дека терасите во кои вложиле многу пари, ќе им бидат урнати. Вакво нешто веќе се случи во Струмица, а во Скопје, градоначалниците сè уште толерираат и им даваат време на угостителите самите да си ги отстранат неправилностите. Градоначалникот на Општина Карпош Стевчо Јакимовски на последната седница на Советот извести дека Град Скопје не одобрува ниту една согласност за поставување урбана опрема, па според закон, штом нема согласност, таа треба да се отстрани. Но, како што посочи, во Карпош има тераси во кои луѓето вложиле и повеќе од 30 илјади евра, а како што е сега ситуацијата ќе треба да се уриваат во цела Лептокарија, Порта Влае, кај Млечен ресторан, односно секаде каде што нема одобрение, како што рече, треба „да се земе багерот и да се чисти“.
Искрен да бидам, има некои тераси што се пристојни и во рамките на дозволено, но има некои што се надвор од сите норми и етички кодекси, поставени во тревници и на премини што го попречуваат движењето на луѓето. Има и такви на кои со елаборат им се одобрени 30 квадрати, а тој си направил 130 квадрати летна тераса – рече Јакимовски.
Советниците донесоа заклучок, еден вид компромисно решение, Општината во наредниот период да постапува во три фази – во првата ќе бидат отстранувани објекти кои имаат урбана опрема на премини и кои ја загрозуваат безбедноста на граѓаните. Во втората фаза, ќе бидат отстранувани тие што зафатиле поголем простор од дозволениот, а во третата тие што се придржувале до добиената дозвола, но сепак не им била продолжена.
Од Град Скопје тврдат дека не е точно дека ниеден угостителски објект нема одобрение, туку дека сите оние чии елаборати, кои ги доставиле до Град Скопје, соодветствуваат со состојбата на терен и исполнуваат услови според закон, имаат добиено согласност за поставување урбана опрема.
Од ова е исклучок општината Центар што ги има преземено лично ингеренциите за издавање согласност за поставување урбана опрема и за тоа постапуваат нивните инспекциски служби. Град Скопје нема ингеренции за уривање бидејќи по Закон е единствена единица на локална самоуправа што нема градежна инспекција, а за утврдување дали одреден угостителски објект има изградено објект или поставил само урбана опрема, во согласност со закон единствено имаат надлежност скопските општини – велат од Градот.
Пред извесен период во ЗЕЛС е формирана работна група што работи на изготвување правилник за поставување урбана опрема со кој треба да се унифицираат правилата кои ќе важат во целата држава. Оттаму велат дека досега работната група одржала неколку средби, а на последната, на која биле поканети и претставници од угостителите, било договорено тие да достават свој предлог во делот на поставување урбана опрема пред објектите.
Во следниот период (по усогласување на термините на членовите на ова работно тело) ќе се одржи нова средба на работната група, на која ќе се разгледуваат и пристигнатите предлози од угостителите, кога се планира да се утврди и предлог верзија. Според досегашниот начин на работа на ЗЕЛС, предлог-верзијата на Правилникот ќе биде испратена на разгледување до сите општини што ќе испратат свои забелешки. Со внесените корекции, предлогот ќе биде разгледан од Управниот одбор на ЗЕЛС, а дури потоа доставен до Министерството за транспорт – објаснуваат од ЗЕЛС.
Во очекување на правилникот со кои ќе се одредат заедничките критериуми, побаравме одговор од останатите скопски општини за тоа како ќе постапуваат со угостителите што немаат одобрение за летни тераси. Од Општина Кисела Вода велат дека целта е да се обезбеди функционален систем во кој сите субјекти ќе работат во согласност со стандардите и законите, без притоа да се наруши дејноста на угостителскиот сектор, кој е значаен за локалната економија.
Ве известуваме дека се спроведени контроли од надлежните служби. За сите објекти што имаат поставена урбана опрема без соодветна дозвола, оставен е разумен рок да се усогласат со важечките прописи и законската регулатива. Општината активно комуницира со засегнатите страни, со цел да се обезбеди законитост, но и да се сочува континуитетот во работењето на угостителските објекти. Доколку по истекот на дадените рокови не се постапи според утврдените обврски, општината ќе постапи во рамките на законските надлежности – велат од Кисела Вода.
Оттаму додаваат дека внимателно ги третираат сите реакции и барања што доаѓаат од угостителите, имајќи предвид дека тие претставуваат важен дел од локалната економија, но дека целта е да се обезбедат рамноправни услови за сите, почитување на прописите и зачувување на урбаниот ред и јавниот интерес.
Инспекциските служби на Општина Аеродром во изминатиот период извршиле вонредни контроли на сите угостителските објекти што работат на територијата на општината.
По сета собрана документација, би можеле да ве информираме дека во моментов се спроведуваат постапки за над 40 објекти. Инаку, комуналната и градежната инспекција на Општина Аеродром е секојдневно на терен и ги врши редовните контроли во угостителските објекти, тврдат од Аеродром, без да прецизираат дали ќе ги уриваат летните тераси на локалите што немаат одобрение за нивно поставување.
Општина Центар е една од општините каде што се наоѓаат најголем број кафеани и ресторани, истакнува градоначалникот Горан Герасимовски, објаснувајќи дека имале веќе неколку состаноци со угостителите заедно со градоначалниците на Кисела Вода и на Аеродром поврзано со летните тераси.
Ја отворивме темата и на ЗЕЛС по немилиот настан во Кочани, изработивме и информативни листови што беа доставени до сите угостителски објекти и во нив беше наведено што сѐ треба да поседуваат за да ги исполнат условите, покрај елаборат, ПП-заштита и ред други закони што треба да ги почитуваат за да функционираат. На ЗЕЛС се договоривме да се направи посебно комисија за да се класифицира, сите да имаме исти услови за вадење одобрение за урбана опрема, мислам дека утре или задутре повторно има состанок работната група, со цел да се направат овие програми, правилници што ќе важат во целата држава – вели Герасимовски.
Според него, во меѓувреме општинската инспекција казнува, дадена била и насока сите што не ги исполнуваат условите да добијат решение за отстранување, а на тие што ги исполнуваат, им се продолжува решението за поставување урбана опрема. Општина Центар дава одобрение за поставување летни тераси на Боемска 1 и 2 и на дел од угостителските објекти во Мал ринг. Но, ниедна од општините не прецизира до кога ќе се толерира работењето на летните тераси што немаат дозвола за поставување и кога би се случило нивното евентуално уривање.
