Васил Јованов е еден од „успешните“ во „скапанава“ држава. Еден од оние кои заедно со мама и тато успешно го надмудруваат системот. Уште како малолетник, во 2021 година ја добива првата судска опомена за нарушување, на јавниот ред и мир. Следната година удира во паркиран автомобил и повредува жена, сопатник, која се согласила да не биде гонет кривично и да плати 18 илјади денари во буџетот, за потоа во изнајмен стан да му бидат најдени марихуана и кокаин. За тоа, со адвокат се брани пред судот, се кае за срамот што им го предизвикал на своите родители и тврди дека веќе се откажал од дрогата.
Па така судијката која веќе е објавена со име и со презиме, наместо во затвор му изрекува мерка за во воспитно поправен дом, која уште не е правосилна, бидејќи Апелација по половина година се уште не одлучила. Бил четири месеци во Шутка, но со пресудата оваа мерка му е укината. Судот проценил дека тој доаѓа од функционално семејство, со оглед на тоа дека татко му работел во АРМ, а мајка му имала исто така успешна кариера. И така тој никогаш не го добил она што му следува, се додека не излезе од својот скап автомобил кој го возел без возачка дозвола, пијан и не сфатил дека на пешачки премин на црвено, убил невина девојка. Тогаш вика и вришти, проверува дали девојката е жива и сфаќа дека сега со врски не може да врати човечки живот.
Јавноста дозна за недопирливиот откако беа објавени делумно точни информации од извори во Министерството за внатрешни работи дека Јованов претходно бил фатен со дрога и имал многубројни сообраќајни прекршоци. Најмногу повикано за неговата неказнивост беше скопското јавно обвинителство на чело со обвинителот кого власта го пенали со месеци. Откако обвинителството се исчисти, префрлајќи ја одговорноста, на ред дојде судот и судијката која наместо во Шутка го пратила во воспитно поправен дом. А судот порача дека ова е општествен, а не правосуден проблем. И наместо да се бараат точни информации и вистината, се впрегнаа партиските „ботови“ на социјалните мрежи, што повеќе да го зацрнат судско-обвинителскиот систем, а да прикажат колку МВР на чело со Тошковски е успешно. А па другите да прикажат дека таткото бил близок до ВМРО-ДПМНЕ.
Но, недопирливите се заштитени од сите, затоа што кај нас тоа што не може да се купи со пари, може да се купи со многу пари и лажна моќ и влијание. Седиме на маса и паметуваме како некој наш пријател во странство платил дури 1.000 долари оти го фатиле како вози под дејство на алкохол. Ама тоа е таму нормално, кај нас не е. Оти тука светот се врти околу нас и околу нашите малечки принцови и принцези кои се чудо од дете. Тие не смеат да добијат помалку од петка, ним не смее наставникот да им повиши тон и да им каже дека згрешиле.
Тие се трауматизираат, ги знаат своите права. Нив за се ги бива и од самото раѓање знаат дека мама и тато се многу “битни” и тие се нешто повеќе од другите. И така се создава тој систем кој го слави и воздигнува незаслуженото, неодговорноста и феноменот „знаеш кој сум јас“. Не, јас не знам кој си ти, но ти ќе дознаеш кој си кога изопачените вредности кои сте ги негувале во „функционалното“ семејство ќе ти се удрат од глава и ќе ти го уништат животот. И тука нема никој недопирлив да биде поштеден. Може ќе има лажна успешна професионална кариера и пари, но нема никогаш да го има она што се добива искрено, без да се бара нешто за возврат, без да се има некаква корист.
Но, тука ќе настрадаат и невините, оние кои крваво се борат за подобар живот. Ним треба да ги заштити државата, а тука е и МВР, не само судиите и обвинителите. Тие не соопштија официјално колку прекршочни пријави имал Јованов, како се дозволило упорно да дивее по скопските улици без сообраќајна дозвола. Судот и обвинителството веќе излегоа со сите официјални податоци за Јованов, какви и да се. И додека се протестира за неказнивоста и изигрувањето на системот, Министерството одлучи да пласира неофицијално, делумно точни информации. А новинарите да бидат горди што тоа го „откриле“.
Сите институции се должни јавно официјално да ги соопштат информациите што сите нас не засегаат, точно и прецизно, а новинарите да го пренесат она што е точно. Ние не сме ниту Твитер, ниту Фејсбук, имаме одговорност за се што ќе напишеме, без разлика дали е официјално или неофицијално, а не да бидеме дел од неправедниот систем. Тезата дека ако Јованов бил во Шутка немало да се убие девојче е иста со тезата дека ако веќе Тошковски го имплементираше „Сејф сити“ до јануари оваа година, како што ветуваше, Јованов може претходно ќе бил фатен на камерите и ќе се преземело нешто. Но, најверојатно ќе се калкулира со „Сејф сити“ до локални избори, за гласачите да не бидат многу казнувани. Сепак народот ја избира власта, а од тој народ секој седми е партиски послушник. Најлесно е да тргнеме против другиот, но најтешко е да тргнеме против самите себе, да ја кажеме вистината, а не она што сакаат да го слушнат другите. Да се погледнеме прво себеси, колку сакаме ние да бидеме неказнети, колку сме функционално семејство и како неправедно се бориме со неправдата. Неправедна борба за неправда е најголема неправда.
