Во Собранието, денеска се одржа Конференција: „Трансформирање на иднината: Дигитална стратегија за современ парламент“, како еден вид почеток, платформа за знаење, за дискусија и за посветеност, простор за споделување идеи, слушање од експерти и градење импулс за она што претстои. Воведни обраќања на Конференцијата имаа претседателот на Собранието, Африм Гаши и швајцарската амбасадорка Вероник Улман. Претседателот Гаши, во својот говор нагласи дека дигиталните платформи – „Веб платформа за канцелариите за контакт со граѓаните“ и „Дигитален мост“ – претставуваат иновативни алатки, односно софтверски решенија, кои имаат за цел да ја зајакнат врската помеѓу Собранието и граѓаните.
Ова претставува пресвртна точка за Собранието, бидејќи преку презентирањето на овие платформи се отсликува заедничката и сериозната посветеност за враќање на достоинството на институцијата, зашто транспарентноста е клучот во борбата против корупцијата. Со овие иницијативи, рече Гаши, се создава можност за сите граѓани, пратеници и за администрацијата, да имаат полесен, побрз и поефикасен пристап до суштински информации. Во таа насока е и неговата заложба – да се создаде Собрание кое навистина ќе биде дом за сите граѓани. „Транспарентноста е нашата визија, а дигиталната трансформација е нашата мисија за таа визија да стане реалност“ – заклучи претседателот на Собранието. Амбасадорката Улман нагласи дека дигитализацијата на Собранието е од суштинското значење во заштитата на демократијата. Дигитализацијата бара време, човечки и финансиски ресурси и административно лидерство. Улман порача дека Швајцарија и после многубројните проекти вложени во Собранието, ќе продолжи со поддршката и се заблагодари и на Парламентот на Естонија за силната поддршка во зајакнувањето на дигиталниот систем на Собранието.
Главно излагање на темата „Градење дигитален парламент: Зошто е важна стратегијата – Објаснување на визијата и целта на ажурираната Стратегија за дигитална трансформација и дигиталните решенија на Собранието“, имаше генералната секретарка на Собранието, Марина Димовска. Во текот на изминатите години, Собранието направи важни чекори во воведувањето дигитални решенија. Како резултат на тоа сега имаме: е-Парламент; е-Пратенички прашања; веб-страница на Собранието; ЕРП Систем за планирање на ресурсите, финансиите, набавките и човечките ресурси; Портал за отворени податоци; е-Регистар; е-Тикетинг, сали опремени со аудио и видео опрема; Собраниско ТВ студио, веб платформа за Канцелариите за контакт со граѓаните; победничката апликација од студентскиот хакатон дизајнирана да го олесни следењето на работата на Собранието. Со силна поддршка од партнерите и службениците, беше развиена Стратегија за дигитална трансформација, која претставува политичка и институционална одговорност. Димовска ја окарактеризира Стратегијата како јасна мапа за следните пет години, со пет стратешки столба: модернизација на законодавните и административните процеси; подобрување на аудио-видео инфраструктурата и јавната комуникација; подобрување на безбедноста и отпорноста на ИКТ; надградба на ИКТ инфраструктурата и проширување на дигиталниот пристап и инклузија.
Живееме во свет каде што дигиталните алатки повеќе не се опционални – тие се неопходни, рече Димовска. Граѓаните сè повеќе се активни онлајн и очекуваат државните институции да бидат во чекор, па така и Собранието. Дигиталната трансформација не е само техничка или административна реформа – тоа е културна промена. Се однесува на тоа како се изготвуваат законите, како се управува со седниците, како се управува со податоците и како комуницираме со јавноста. Ваквото патувањето напред, ќе бара соработка, инвестиции и координација за создавање Собрание каде човечката мудрост и дигиталната моќ работат рака под рака, каде технологијата ги поддржува пратениците и каде што душата на демократијата чука посилно, бидејќи е зајакната од иновациите – истакна генералната Димовска. Иднината е отворено Собрание, без хартија, поддржано од вештачка интелигенција, целосно интегрирана законодавна платформа, платформи за активно вклучување на граѓаните, паметни сали за седници, податочни архиви заштитени со блокчејн технологија. Во рамките на Конференцијата, се одржаа две панел дискусии за „Промени, лидерство, капацитет и инклузија“ и „Вештачката интелигенција и иднината на парламентарното управување – парламенти, отворени податоци и вештачка интелигенција“. Преглед на Стратегијата за дигитална трансформација на Собранието даде Бобан Стојаноски, заменик-генерален секретар на Собранието, а на темите свои гледишта дадоа релевантни личности од областа, во насока на вистинска дигитална трансформација, со глобални примери за одговорна и етичка вештачка интелигенција во работењето, за градење на модерно Собрание, видливо и достапно до јавноста. И нема вештачката интелигенција да ги замени луѓето, но луѓето што ја користат ќе ги заменат оние луѓе што не ја користат. Потребен е нов начин на мислење за стариот начин на работа! – заклучи заменик-генералниот секретар Стојаноски.
