Министерот за внатрешни работи Панче Тошковски е фатен жив во огромна корупциска шема, велат од СДСМ. Од партијата додаваат дека Тошковски откако вчера јавно признал дека МВР доделило тендер вреден 4 милиони евра и на фирма основана само 20 дена пред распишување на тендерот, се скрил и не одговорил на клучните прашања кои ги поставиле од СДСМ.
„Наместо да се крие и да се претставува како борец за правда, да излезе и да одговори веднаш. Како е можно фирма што дотогаш не постоела, да ги исполни сите услови и да достави мостри за квалитет? Кој ѝ ги кажал условите однапред? Кој ја подготвил да учествува и да победи? Каде се тие мостри што ги доставила, кога фирмата не ни постоела? Тошковски вели дека се водел по „квалитетот“ на понудата. Како тоа се дефинира квалитет кај фирма без искуство, капацитет и историја на работење? Или квалитетот се квалитетни врски и провизии за Тошковски и ДПМНЕ?“ прашуваат од опозицската партија. СДСМ бара итна постапка од Јавното обвинителство, распит на сите вклучени во тендерот, испитување на можни кривични дела: злоупотреба на службена положба, местење тендер и перење пари и поништување на целиот тендер.
