„Она што исто така го имам како информација е дека снабдувачите на големо веќе ги преправаат цените до трговците на мало со тоа што се очекува да се покачат цените, но повикувам на општествена одговорност од страна на трговците на мало и на трговците на големо со цел доколку има простор и можност цените да ги остават на истото ниво“,
изјави денеска директорот на ДПИ, Горан Трајковски.
Тој вели дека не можат да влијаат на цените, но верува дека дел од големите синџири маркети ќе прават акции со кои ќе има намалувања на одредени прехранбени производи.„Од тоа што го видов во изминатиот период дека неколку големи трговци на маркети како општествено одговорни дадоа дополнителни намалувања на дополнителни прехранбени производи коишто не беа опфатени со одлуката на Владата, верувам дека тоа ќе се случи и сега, а граѓаните ќе одлучат во кој од нив ќе пазарат, бидејќи не можеме да спречиме доколку цената на лебот од 29 денари порасне на 35 денари“,
рече Трајковски.
Она што во следниот период ќе го контролира Пазарниот инспекторат, како што појасни тој, е дали се почитуваат Законот за трговија, Законот за заштита на потрошувачи, односно дали соодветно се води трговска евиденција, дали потрошувачите евентуално се доведени во заблуда, една цена на рафт, друга цена на каса, реалност на попустите и слично.Во текот на вчерашниот ден, инспекторите на Пазарниот инспекторат направиле контрола во сите големи синџири на маркети низ државата по однос на одлуките на Владата, но за резултатите, како што рече Трајковски, мора да се причека додека надзорите не завршат во целост.
„Надзорите се пообемни и ќе траат три до четири дена, а од првичните информации утврдено е дека има одредени прекршоци, но ќе почекаме да завршат надзорите во целост и да ги соопштиме конечните податоци“, рече Трајковски.Мерката за гарантирана цена на дел од прехранбените производи, како лебот, млекото, јогуртот, тестенините, дел од месните производи, како и на безалкохолните пијалаци и пивото од денеска престана да важи.Истече и рокот на владината одлука со која беа намалени увозните давачки за зеленчукот.Институциите најавија засилени контроли за да се интервенира во случај на драстично поскапување на производите, со оглед дека законот за нефер трговски практики, со кој се очекува да се амортизира состојбата, сè уште не е изгласан.
