АМЕРИКАНСКАТА АМБАСАДА ОБЈАВИ ДЕКА ПАК ЌЕ ПОЧНЕ СО ИЗДАВАЊЕ СТУДЕНТСКИ ВИЗИ, ЌЕ СЕ ПРОВЕРУВААТ И ПРОФИЛИТЕ НА СОЦИЈАЛНИТЕ МРЕЖИ НА АПЛИКАНТИТЕСпоред новите правила, ќе се врши темелна проверка на кандидатите кои ќе треба да ги прилагодат своите профили на социјалните мрежи така што тие да бидат јавно достапни, најавија од Амбасадата. (Фото: Амбасада на САД)
Американската амбасада во Скопје објави дека наскоро ќе почне повторно постапката за аплицирање за студентски визи. Како што најавија од Амбасадата, според новите правила ќе се врши темелна проверка на кандидатите, кои исто така ќе треба да ги прилагодат своите профили на социјалните мрежи така што тие да бидат јавно достапни.
„Стејт департментот е посветен на заштитата на нашата нација и нашите граѓани, почитувајќи ги стандардите за национална безбедност и јавната безбедност преку нашиот процес на издавање визи. Американската виза е привилегија, не право. Ги користиме сите достапни информации во нашиот скрининг и проверка на визи за да ги идентификуваме кандидатите за виза на кои им е забранет влез во САД, вклучувајќи ги и оние кои претставуваат закана за националната безбедност на САД. Според новите правила, ќе спроведеме сеопфатна и темелна проверка, вклучително и на онлајн активностите на сите студенти и посетители на размена“, соопштија од Амбасадата на САД.
За да се олесни оваа проверка, на сите кандидати ќе им биде наложено да ги прилагодат нагодувањата за приватност на сите своите профили на социјалните мрежи.
„Секое решение за виза е одлука за национална безбедност. Соединетите Држави мора да бидат внимателни за време на процесот на издавање визи за да се осигураат дека оние кои аплицираат за прием немаат намера да им наштетат на Американците и на нашите национални интереси“, додаваат од Амбасадата.
