„Со оглед на високиот степен на трговија со ЕУ, можни се преносни ефекти и во регионот“, велат од Народната банка Сè поголемиот број трговски препреки може да се одразат врз светските економски текови, како и врз економиите во регионот на Централна и Југоисточна Европа како економии со висок степен на интегрираност во светската економија. Ова го истакна гувернерката на Народната банка, Анита Ангеловска-Бежоска на тркалезната маса којашто се одржа на Економскиот факултет во Осиек, во рамките на Регионалната средба на гувернери на централни банки. Од Народната банка информираа дека, според проценките на Европската централна банка (ЕЦБ), доколку САД воведат царини од 25 отсто на увозот од Европа, би се намалил растот на европската економија за околу 0,3 до 0,5 отсто на краток рок. Доколку Европската Унија, исто така, воведе царини, инфлацијата во еврозоната би се зголемила за околу 0,5 отсто.
„Со оглед на високиот степен на трговија со ЕУ, можни се преносни ефекти и во регионот“, велат од Народната банка. Од таму додаваат дека за намалување на овие ризици, од особена важност е водењето претпазливи макроекономски политики и засилувањето на структурните реформи со кои економиите од регионот би ја зголемиле својата отпорност на надворешните шокови и би ја забрзале доходовната конвергенција. На регионалната средба се разговарало и за важноста на реформите во сферата на прекуграничните плаќања за поттикнување на трговијата, вклучително и на регионалната трговија и економскиот раст. „Во нашиот регион, токму членството во СЕПА би придонесло за брз и ефикасен платежен систем со помали трошоци, зголемувајќи ја конкурентноста на нашата економија“, велат од Народната банка. На гувернерската тркалезна маса, покрај гувернерката Ангеловска-Бежоска, учествуваа и гувернерот на Хрватската народна банка, Борис Вујчиќ, в.д. гувернерот на Банката на Словенија, Примож Доленц, гувернерката на Централната банка на Црна Гора, Ирена Радовиќ и гувернерката на Централната банка на Босна и Херцеговина, Јасмина Селимовиќ. Извор: Новинска агенција МЕТА
