,Тошковски не е од вчера министер. Тој бил министер година дена: и од техничката влада на Талат Џафери, па преку новата политичка влада. Тој бил министер и во време на фалсификуваната лиценца. Ние сме земја која има колективни трауми досега. При секоја ваква колективна траума, прво нешто е министерот да си даде оставка, ако не и целата влада. Тошковски не прави разлика меѓу гнев и револт, но тоа е негов пропуст – истакна претседателот на Левица, пратеникот, проф. д-р Димитар Апасиев, во емисијата ,,ТВ Објектив” на КТВ.
– Државата потфрли. Она што е суштински битно во овој случај е дека можеше да биде спречено. Не постои она што го кажува Обвинителството во Кривичното право – верижни реакции. Не постои такво нешто. Тргнувате да апсите од актуелни, па наназад, а не обратно! Вмроидите се обидуваат ова перпетуирање да ни го претстават како новото нормално и ние одбиваме тоа да го прифатиме. Затоа ние поднесовме интерпелација против Панче Тошковски. Таа се базира на 10 точки од коишто 5 се однесуваат, стриктно, на трагедијата во Кочани, којашто е најголема трагедија во Европа – рече претседателот Апасиев. Тој ја посочи првата точка за интерпелацијата на Тошковски и појасни дел од пропустите во однос на функционирањето на дискотеката во Кочани.
– Диско – шталата била оставена без контрола. Таа била партиски штаб, практично, на ДПМНЕ каде што сите локални функционери нивни се собирале, локале, јаделе, пиеле, веројатно, и без пари како што имаат обичај да прават. Нашата интерпелација е законски заснована. Ние ги следевме законските одредби од Законот за угостителска дејност, од Законот за внатрешни работи, од Законот за полиција. Ги следевме сите ингеренции кои не биле применети во случајот. Тоа се кардинални пропусти – објасни лидерот на Левица. Лидерот на Левица говореше и за оставките што при вакви трагедии се поднесуваат од морални причини.
– Првиот чин кога се случуваат вакви трагедии е оставка од морални причини. Тошковски нема капацитет да сфати што значи тоа. Го прашуваат новинари дали чувствува одговорност. Вели дека чувствува, а не дава оставка. Тоа значи дека ништо не чувствуваш. Оставка од морални причини значи дека немаш вина, ама од морални причини треба да дадеш оставка, бидејќи во твој мандат објективно се случил настанот и има системски пропусти и ти даваш оставка. ,,Миле ми текна”, Миле Јанакиевски, кога се удавија бугарските туристи во Охрид си даде оставка. Венко Филипче за Модуларната си даде оставка. Тогашните премиери измислија нов институт – неприфаќање на оставка. Не можете да не прифатите оставка! По сила на закон, тоа е неотповиклива оставка – образложи Апасиев.
– Вие ги немате обвинето тие што први требало да ги обвините, а тоа се актуелните носители на јавни функции, затоа што вие не сте дојдени истата ноќ на власт, па да речете ние сме нови. Не, вие сте година дена претходно. Сте имале илјадници можности. Државниот пазарен инспекторат, директорот Влатко Стојковски не направил инспекција. Од Дирекцијата за заштита и спасување, сега ги поапсија претходните. Како можете да поапсите министер кој бил пред 10 години, а да не го поапсите сегашниот? Нема логика! Обратно треба да апсите! Оттука треба да апсите, оттука натаму треба да апсите, а не оттаму наваму – апелираше претседателот на Левица. Во врска со кривичната што ја спремаат за премиерот Мицкоски и која ќе биде нареден чекор, Апасиев истакна дека тоа е кривично дело – попречување на правдата, односно, нудење или давање корист со цел да се саботира некоја истрага.
– Следува кривична за Премиерот. Ќе следуваат и интерпелација за Премиерот и за Обвинителот; ќе следува и барање за надзорна расправа. Можеби, и Постојаната анкетна комисија ќе се активира, затоа што ова е трагедија која не смее да остане под тепих и која, најбитно – можеше да биде спречена, доколку се постапуваше согласно закон”. Што е постапка за разрешување на јавен обвинител, па не го разрешуваме, освен пазар? Ние во тоа гледаме попречување на правдата. Ние сега нема да те разрешиме, ама ти нема да ги гониш ,,нашите” и тоа, навистина, се случува – додаде Апасиев во однос на најавената кривична за Премиерот. Апасиев потсети дека само Градоначалникот на Кочани си даде оставка, а на првата прес – конференција Премиерот беше бранител на Градоначалникот на невидено. – Ние извадивме документ по Закон за угостителска дејност дека Градоначалникот морало да води регистар, па тек тогаш го почнаа во истрагата. Значи, сè треба опозицијата да буцка, за да они апсат. Во ред, ние ќе буцкаме, вие продолжете да апсите, но апсете ги овие кои треба – рече тој. Претседателот на Левица обзнани дека за поапсените има криво поставено обвинение.
– Скоро, грото од сите овие 40 – 50 луѓе кои се поапсени се за едно кривично дело обвинети, а тоа е ,,тешки дела против општата безбедност”. Прочитајте го битието на тоа дело и ќе видите дека нема врска со тоа за што ги обвинуваат. На пример, во делото пишува: ,,…тој што со пожар, поплава, зрачење ќе предизвика општа опасност и ќе настанат смртни последици…” Кажете ми како министерот или оној амбасадорот во Норвешка што бил, го предизвикал пожарот? Намерно ги поставуваат вака на криво работите. Значи, тој човек таму можел да одговара: за земање мито, за злоупотреба на положба, за фалсификување исправа, за сосем други кривични дела. Не може тој да одговара за предизвикување на пожарот и не може тоа правно да го браните со верижни реакции! Не постои такво нешто! Тоа е како вие да ме упукате со пиштол и да одговара производителот на пиштолот во ,,фабриката во Германија”. Во правото има причинско – последична врска и тоа е релевантно пред суд. Не е релевантно само дека јавниот гнев е насочен кон апсење – појасни детално лидерот на Левица.
Апасиев повторно потенцираше во која насока да продолжи да тече апсењето. – Апсете ги и вашите – овие што не ги поапсивте, уште десетина треба минимум да се поапсат и кога ќе дојдете пред суд, дајте им право обвинение, а не вакво, оти ќе ви падне и пак судството ќе ви биде криво! Овие вашиве недоквакани се криви, затоа што во една кривична пријава сакаат сите да ги спојат што не е држливо правно. Намерно јавно кажувам дека ако остане ова обвинение, освен гневот, нема ништо од право тука да видите, затоа што се криво поставени – детално образложи Апасиев. Претседателот на Левица потсети дека по Деловник, доколку функционерот на кого му е поднесена интерпелација си даде оставка, интерпелацијата паѓа и е беспредметна.
– Панче има две можности: или да даде оставка во наредните 10 дена, или да дојде на седница и да се соочиме, или да избега и да даде писмен одговор или да нè игнорира комплетно. Како орган кој ја контролира извршната власт, ќе дадеме сè од себе преку парламентарни инструменти тоа да го сториме и ова е само почеток – рече Апасиев. Тој поентираше дека партнери на ДУИ и СДСМ може да бидат само на ДПМНЕ, затоа што кога немаат двотретинско, овие две партии им обезбедуваат. Апасиев потсети дека така беше со Кривичниот законик, за да си се амнестираат елитите меѓу себе… Според Апасиев, Левица никогаш ниту кокетирала со тие две партии, ниту им давала гласови, ниту се пазарела. Сектор за медиуми и односи со јавност при ПП Левица
