Без разлика дали внимаваме на здравјето или на паричникот, некои видови храна никогаш не треба да ги купуваме во супермаркетите. Огромните количини шеќер, штетни масти, сол и адитиви со текот на времето создаваат ризик од дијабетес, срцеви заболувања и многу други хронични болести, пишува „Пун куфер“. Освен тоа, еднаш кога ќе се навикнеме на храна полна со засилувачи на вкусот, тешко е да се вратиме на природната и здрава исхрана. Во морето на нездрава храна што нè привлекува од полиците во супермаркетите, постојат полоши и уште полоши опции. Ви издвоивме неколку видови храна што слободно можете да ги прескокнете ако сакате да живеете поздраво. Преработени житарки Иако се рекламираат како здрави, многу видови житарки содржат големи количини шеќер и малку растителни влакна. Ова може да доведе до нагли промени на нивото на шеќер во крвта и до зголемување на телесната тежина. Честопати производителите користат маркетиншки трикови за да нè убедат дека овие житарки се добар избор за појадок.
Рафинираните житарки, житните снегулки и купечките мусли мешавини најчесто се високо процесирани и треба да се избегнуваат. Ако сакате да бидете сигурни што внесувате, најдобро е да изберете непреработени или минимално преработени житарки, како овесни снегулки без додатоци, во кои можете сами да додадете семки, овошје и зачини по ваш вкус. Супени коцки и готови супи Купечките супени коцки често содржат екстремно високи количини сол, адитиви, конзерванси, засилувачи на вкус (како натриум глутамат) и вештачки ароми. Кај домашната супа, вие избирате свежи и здрави состојки без непотребни хемикалии. Затоа, подобро е да ги избегнувате готовите супени коцки или барем да избирате варијанти со помалку сол и адитиви. Со малку планирање, лесно можете да подготвите домашен бујон, да го замрзнете и да го користите кога ви треба. Освен што ќе биде поздрав, ќе има и подобар вкус. Вештачко сирење. Вештачките сирења можеби по изглед и текстура потсетуваат на вистински сирења, но ако ги погледнеме состојките, често ќе најдеме бројни нездрави додатоци. Покрај неидентификуваните масти, скроб, бои и ароми, ваквите производи можат да содржат и разни други хемиски состојки што можат да му наштетат на здравјето.
Пример за тоа се додатоците E407 (карагенан), E412 (гуар гума) и E417 (тара гума), кои можат да предизвикаат дигестивни проблеми, па дури и посериозни болести. Најлесен начин да препознаете неквалитетно сирење е ниската цена, но најважно е внимателно да ја прочитате декларацијата. Природното сирење обично има кратка листа на состојки. Особено бидете внимателни со сирењата во листови, ренданите сирења (кои често содржат додадени состојки за да не се лепат) и сирењата означени како „сирење за пица“. Мелено месо Меленото месо е главна состојка во многу јадења, но ако не внимавате што купувате, може да биде ризично. Пакуваното мелено месо често не е свежо, а не можете ниту да знаете кои делови од животното се мелеле. Истражување спроведено пред неколку години покажа дека секое петто пакување мелено месо е со полош квалитет отколку што е наведено на декларацијата. Најдобро е да купувате свежо месо и да замолите месарот да ви го сомеле пред вас. Така ќе бидете сигурни што добивате. При купување, обрнете внимание на бојата – свежото говедско мелено месо треба да биде црвено. Ако месото е темно, има чуден мирис или леплива текстура, најдобро е да го избегнете. Павлака за готвење Готварската павлака е разредена верзија на вистинската павлака, која содржи многу вештачки адитиви и нездрави масти. Освен тоа, таа не дава добар вкус на јадењата, а ако ја додадете во поголема количина, може да ги маскира другите состојки. Наместо да користите купечка павлака за готвење, можете да ја замените со полномасно млеко и малку путер, грчки јогурт или маскарпоне – сите овие алтернативи се повкусни и поздрави.
