Бројот на жртви од уривањето на покривот на ноќниот клуб „Џет Сет“ во Санто Доминго на 8 април за време на концерт стана уште поголем завчера, сабота, достигнувајќи 234 жртви, со смртта на 33-годишна жена која беше згмечена, се вели во соопштението на здравствените власти.
Жртвата им подлегнала на повредите по 46 дена поминати на интензивна нега, бидејќи претрпела многу сериозни повреди, особено на ‘рбетот, според соопштението од болницата каде што била лекувана.
Во доминиканските судови се поднесени 52 тужби против менаџерите и сопствениците на дискотеката. Но, до овој момент, против никого не е покрената кривична постапка за катастрофата, која беше опишана како најлошата во последниот век во Доминиканската Република – во која, меѓу другото, животот го загуби и познатиот пејач на меренге Руби Перез, кој бил на сцената кога се урнал покривот. Според некои експерти, несреќата веројатно се должи на фактот дека на покривот била ставена преголема тежина, пред сè на професионална опрема за вентилација и климатизација во просторот, како и на прогресивното влошување на структурната адекватност на зградата поради акумулацијата на влага и продолжените вибрации од музиката во дијапазонот, но и танцувањето на посетителите – проблеми кои биле влошени од недостатокот на надзор и контрола.
