Австралиец е обвинет за кршење на законите за непролиферација (неширење на нуклеарното оружје во неговата земја), откако нарачал примерок од плутониум преку интернет, во обид да ги собере сите елементи на периодниот систем. Во август 2023 година, 24-годишниот Емануел Лиден бил уапсен во домот на неговите родители во Сиднеј, Австралија, за време на голема операција во која биле вклучени службеници на австралиската гранична полиција, пожарникари, полиција и медицински тимови. Тој се изјасни за виновен за кршење на законите за неширење на нуклеарното оружје со увоз на плутониум во земјата, што предвидува затворска казна до 10 години, пренесува „ИФЛ саенс“. Сепак, неговиот адвокат тврди дека Лиден не е манијак или луд научник со злонамерни планови, туку „бубалица“ чија цел била да ги собере сите елементи од периодниот систем, вклучувајќи ги и радиоактивните.
„Тој не ги увезувал или ги поседувал овие предмети со никаква злонамерна намера… овие прекршоци биле извршени од чиста наивност. Тоа беше форма на утеха преку неговото повлекување во собирање. Можеше да биде сè, но во овој случај тој се фокусираше на собирање на елементите од периодниот систем“, изјавил адвокатот Џон Сатон пред Окружниот суд во Сиднеј.
Лиден очигледно е страствен колекционер кој поседува импресивен број на поштенски марки, банкноти и монети, но обвинителите не се согласуваат дека тој е само заблуден, безопасен колекционер. Тие тврдат дека потрагата по нелегални материјали како плутониум создала пазар што инаку не би постоел во Австралија. Според судските документи, 24-годишникот нарачал мал примерок од плутониум од американската „научна веб-страница“ на адресата на неговите родители. Неговиот адвокат тврди дека пакетот го имал неговото име и адреса на кутијата, што укажува на тоа дека тој немал намера да го користи материјалот за да предизвика штета. Властите точно знаеле што има во пакетот и кој го нарачал, но наместо да ја одземат пратката и да побараат објаснување од Лиден, дозволиле плутониумот да биде доставен на адресата на кутијата, а потоа организирале голема операција за апсење на клиентот на Сатон.
„Нивото на реакција беше крајно претерано со оглед на тоа што истражните органи веќе го знаеја. Наместо да му се даде можност да ги врати предметите, на него сè беше фрлено“, рече Сатон.
Откако беше обвинет за внесување плутониум во Австралија, Лајден беше отпуштен од својата работа како чирак во железница и моментално заработува за живот готвејќи на скара. Неговата казна треба да ја добие од судијата Леони Фланери на 11 април.
