Посетата на кинескиот претседател Кси Џинпинг на Русија го промовира меѓународниот мултилатерализам и политичкото реструктуирање, што има историско значење, изјави кинескиот министер за надворешни работи Ванг Ји во врска со четиридневниот престој на Кси во Москва и учеството на парадата по повод 80-годишнината од победата над нацистичка Германија во Втората светска војна. „Многу луѓе, и во Кина и во странство, веруваат дека оваа посета дополнително ќе ја зајакне сеопфатната стратешка соработка меѓу Кина и Русија во новата ера и ќе придонесе за заедничко одржување на повоениот меѓународен поредок, како и на повеќеслојниот мултилатерализам на светот и реконструкцијата на меѓународниот политички модел, што е од големо историско значење“, ја цитираше изјавата на Ји кинеското Министерство за надворешни работи на својата веб-страница.
Сè додека Кина и Русија стојат рамо до рамо, политиката на сила нема да може да надвладее, со додава во изјавата. „Додека двете големи земји – Кина и Русија – стојат рамо до рамо и тесно соработуваат, меѓународниот поредок нема да биде нарушен, правдата во светот нема да падне и политиката на моќ нема да може да надвладее“, им рекол Ванг Ји на новинарите коишто го придружуваа за време на посетата на Москва. Шефот на кинеската дипломатија, исто така, истакнал дека „промените се нормална состојба на меѓународната ситуација, но меѓусебната доверба и поддршка меѓу Кина и Русија остануваат непроменети“. Ова беше единаесетта посета на Кси на Русија откако ја презеде функцијата во 2013 година. Тој и Путин разговараа речиси четири часа, нарекувајќи се еден со друг „блиски пријатели“. Путин најави и посета на Кина на есен, каде што ќе се одбележи поразот на Јапонија во Втората светска војна.
Заедничката изјава објавена по разговорите отиде подалеку од претходните, директно обвинувајќи ги САД. „САД и нивните сојузници се обидуваат да го прошират НАТО кон азиско-пацифичкиот регион, создаваат затворени сојузи и се обидуваат да ги придобијат земјите во тој регион за нивната ’индо-пацифичка стратегија‘, со што го поткопуваат мирот, стабилноста и просперитетот во регионот“, се наведува во текстот. Кина со години го споделува предупредувањето на Москва дека ширењето на НАТО кон истокот ја загрозува безбедноста на суверените земји, како и глобалниот мир. Исто така, Москва и Пекинг со заедничката објава порачаа дека „едностраните принудни мерки, вклучувајќи ги и економските санкции кои го заобиколуваат Советот за безбедност на ОН, ја кршат Повелбата на Обединетите нации и меѓународното право и ја нарушуваат глобалната безбедност“. Кина со години е во трговска војна со САД, а двете земји викендов треба да ги одржат почетните преговори за смирување на тензиите. Истовремено, САД ја притискаат Русија да се согласи на мировни преговори со Украина. Во изјавата, исто така, се наведува дека Русија „цврсто ги поддржува кинеските мерки за заштита на суверенитетот и територијалниот интегритет и постигнување национално обединување“. Иако Кина и Русија немаат официјален воен сојуз, тие имаат интензивна воена соработка. Според податоците на проектот ChinaPower, само минатата година одржале дури 14 заеднички воени вежби. На воената парада во Москва во петокот, учествуваше и кинеската почесна гарда, што е првпат од 2015 година.
