Цената на лебот да се намали на 20 денари, да се зголемат субвенциите за производството на пченица и за 50 проценти да се намалат заштитните средства зашто се меѓу најскапите во регионот, бараат од Асоцијацијата на земјоделци и фармери. Тие велат дека при сегашната ниска цена на пченицата, која се движи од 9 до 11 денар за килограм, цените на лебот од 30 до 35 денари за просечна векна, се превисоки. -Според откупната цена на пченицата која беше од 9 до 11 денари за килограм, реално е цената на лебот да биде 20 денари. Тоа значи дека ние, како Асоцијација, имаме направено прецизна калкулација во која не треба лебот да биде повеќе од 20 денари. Предлагаме сите мелничари и пекарници да ја прифатат оваа наша калкулација и уште веднаш и цената на лебот да биде 20 денари, изјави Перо Стојкоски, претседател на Асоцијацијата на земјоделци и фармери. На земјава годишно ѝ се потребни околу 360 000 тони, а според Асоцијацијата, се произведуваат 230.000 до 240.000 тони. Другото се увезува од соседните земји. Според Александар Ристески, производител на леб од Прилеп, сегашната цена на лебот од 30 до 35 денари е реална и прифатлива. -СМЕТАМ ДЕКА СЕГАШНАТА ЦЕНА Е РЕАЛНА. ПРЕД 10-15 ГОДИНИ, ЦЕНАТА НА ЛЕБОТ БЕШЕ 25 ДЕНАРИ. СЕГА, ПРОДАЖНАТА ЦЕНА НА ЛЕБОТ Е 30 ДЕНАРИ. КОГА ЌЕ НАПРАВИМЕ СПОРЕДБА НА РЕСУРСИТЕ, НА РЕПРОМАТЕРИЈАЛИТЕ, НА СТРУЈАТА, НА РАБОТНАТА РАКА, А ПРЕД 10-15 ГОДИНИ, ПА И СЕГА, ПА МАКАР И НА БРАШНО, МИСЛАМ ОВАА ЦЕНА Е ПРИФАТЛИВА ЗА ПОТРОШУВАЧИТЕ, ВЕЛИ ТОЈ.
Асоцијацијата на фармери посакува да се зголеми домашното производство на пченица, но бара повеќе субвенции и намалување од 50 проценти на цените на заштитните средства, кои се меѓу највисоките во регионот. „Можеби еден ден ќе дојдеме во ситуација на зголемени површини и производство на пченица, но за оваа реколта не посеавме доволно поради недостиг од механизација за обработка на површините. Според состојбите, за оваа година треба да очекуваме принос од околу 240 000 тони пченица. Државата треба да го поддржува посилно производството на пченица. Таа треба да ја покрива загубата од производната до продажната цена. Инспекторатот за земјоделство треба повеќе да се позанимава со земјоделските аптеки, зашто цените на заштитните средства се многу големи што ги зголемува трошоците за производство. На пример заштитно средство „логранд“ за пченицата во нашите аптеки чини 400 до 500 денари, а во соседните земји е 100 денари“, вели претседателот на Асоцијацијата на земјоделци и фармери Стојкоски. Според производителите на леб, зголеменото производство на пченица може да влијае на намалувањето на цената на лебот, но ако домашната пченица во мелниците за брашно не се меша со увезена.