По десет години пауза од најпрестижниот избор за убавина, Мис на свет, Македонија повторно има своја претставничка. Веста дека студентката Чарна Невзати од Скопје ќе ја претстави земјата на Мис на свет 2025 во Индија, на 31-ви мај, ја изненади пошироката јавност која ги следи случувањата околу изборот. Имено, отсуството на Македонија од изборот последната деценија се должеше на Лидија Велковска, сопственичка на лиценцата за Мис на Македонија за Мис на свет, која во повеќе наврати појаснуваше дека без конкретна финансиска поддршка не може да организира достоинствен избор, ниту пак да испрати претставничка на настанот.
Во неколку наврати јавно апелираше за поддршка од државата, бидејќи обезбедувањето на спонзорства од приватниот бизнис сектор, одело тешко. Велковска, која и самата беше Мис на Југославија во 1975 година, а на Мис на свет истата година го освои високото четврто место во Лондон, беше сопственичка на лиценцата за изборот од 1996 година. Последен пат кога испрати претставничка на настанот беше во 2015 година, во Саниа, Кина, а земјата ја претставуваше моделот Емилија Розман, која беше интерен избор на Велковска, без јавен кастинг. Во наредните години земјата се повлече од настанот, а на новинарските прашања зошто не учествуваме на популарниот избор на убавица, Велковска вината ја посочуваше кон незaинтересираноста на институциите и државата, да помогнат финансиски, правдајќи се дека се работи за организација за која биле потребни најмалку 35 илјади евра. Кажуваше дека иако обезбедувањето на средствата оди тешко, сепак лиценцата не ја давала додека е жива.
Сега пак, според последните информации, зад лиценцата стои нов сопственик, Шаќир Села, кој е сопственик и на модната агенција „Даман“ од Истанбул. Тој стана познат за пошироката јавност кога минатата година застана зад организацијата на изборот за Мис Универзум на Македонија. Избраната мисица, Теа Ѓоргиевска, ја претстави Македонија на Мис Универзум во Мексико. Околу тоа како Велковска по речиси 30 години се повлекла од настанот и ја отстапила лиценцата за која тврдеше дека не ја дава додека е жива, нема конкретна информација за јавноста. Таа не одговори на телефонските повици на ,,Фокус”, со цел да дознаеме како се одлучила на тој чекор. Инаку, прва Мис на Македонија за Мис на свет беше Вера Мештеровиќ во 1996 година. Во годините кои следеа земјата ја претставија уште 14 девојки, но повеќето од нив по изборот се повлекоа од јавната сцена.
