Поранешниот филипински претседател Родриго Дутерте ја презема целосната одговорност за „војната против дрогата“ на неговата влада, рече тој во видео порака објавена на неговиот Фејсбук профил, додека очекува долга правна битка пред Меѓународниот кривичен суд (МКС) во Хаг. „Без разлика што се случило во минатото, јас ќе чекорам напред за нашите органи за спроведување на законот и војската. Веќе го кажав ова, дека ќе ве заштитам и ќе одговарам за се“, истакна Дутерте. Ова се неговите први коментари по транспортот со авион во Хаг. Дутерте беше приведен од МКС вчера, среда, по неговото апсење во Манила под обвинение за убиства поврзани со „војната против дрогата“ што тој ја водеше и за време на која беа убиени илјадници наводни шверцери и корисници. На видеото кое имаше 10 милиони прегледи, се гледа како зборува само Дутерте облечен во бела кошула. Се чини дека ова е снимено во авионот, бидејќи слабото зуење на моторот се слуша во позадина.
МКС во соопштението рече дека Дутерте „е предаден и е задржан од Меѓународниот кривичен суд. Тој беше уапсен од властите на Република Филипини (…) под обвинение за убиство како злосторство против човештвото“. Поранешниот филипински претседател во наредните денови ќе биде изведен пред судија на МКС во Хаг на првично сослушување, се наведува во соопштението. Тој е префрлен во притвор на холандскиот брег. „Тоа ќе биде долг правен процес, но ви изјавувам дека ќе продолжам да ѝ служам на мојата земја. И така нека биде, ако тоа е мојата судбина“, истакна Дутерте, уверувајќи ги своите поддржувачи дека е добро. „Добро сум, не грижете се“, рече 79-годишниот поранешен филипински претседател во краткото видео обраќање.
En route to The Hague, former Philippines President Duterte took responsibility for the drug crackdown that led to his ICC arrest warrant, vowing to protect police and military from consequences. pic.twitter.com/UaSrsMw0HO
— Al Jazeera English (@AJEnglish) March 13, 2025
Дутерте, кој беше претседател на Филипините од 2016 до 2022 година, се очекува да се соочи со обвиненија за злосторства против човештвото за надгледување на одредите на смртта во борбата против трговијата со дрога. Тој може да биде првиот поранешен шеф на азиска држава кому МКС му суди. Во налогот за апсење издаден против него од Меѓународниот суд се наведува дека Дутерте ги создал, финансирал и опремил одредите на смртта кои извршиле убиства на наводни шверцери и корисници на дрога. Во шесте години од неговото претседателствување, според полициските податоци, 6.200 осомничени биле убиени во операции за борба против дрогата. Неговата ќерка Сара Дутерте, која е потпретседател на Филипините, пристигнала синоќа во Хаг, соопштија од нејзиниот кабинет. Адвокатите и правниците велат дека неговото апсење и трансфер се значаен момент за МКС, кој е под американски санкции и нема сопствена полиција за апсење на осомничените. Портпаролот на американскиот Стејт департмент рече дека САД се свесни за апсењето на Дутерте од филипинските власти.
