Д-р Билјана Тодорова, специјалист ендокринолог и Канал 5 телевизија се злоупотребени во намонтирано видео кое препорачува препарат за слабеење. Гласовите во видеото воопшто не се на Тодорова и на водителот на Канал 5, што видеото го прави измамничко. Вистиномер анализира објава на социјалната мрежа Фејсбук во која се споделува видео кое е дипфејк, а во кое е злоупотребено името и ликот на д-р Билјана Тодорова, специјалист ендокринолог. Во видео материјалот кој е намонтиран и не е вистински, претставена е Тодорова како да промовира производ за слабеење. Ќе ме мразат фармацевтите, корумпираните ендокринолози и нутриционистите што го признав ова, но морав да кажам. Токму сега за три минути ќе ви кажам како да се ослободите од вишокот килограми еднаш засекогаш за 17 дена без лекови, диети или исцрпувачки тренинзи, изјавува Тодорова во манипулираното видео. Понатаму, Тодорова во лажното видео зборува за тоа дека научници во 2024 година наводно откриле некоја чудесна билка која сега се продавала како лек и чудесно ги топела вишокот маснотии.
Видеото го злоупотребува логото на Канал 5 телевизија и е направено така да делува како да докторката била гостинка во вестите на Канал 5. Но, вакво видео на Канал 5 никогаш не е објавено. Со обратно пребарување на видеото, најдовме дека станува збор за гостување на д-р Тодорова на Сител телевизија. Видеото е земено од емисијата Добриот доктор, обајвена на Јутјуб на 27 јануари 2025 година.
Во ова видео, докторката зборува за проблеми со тироидната жлезда и за хипертироизам, а не за некаков лек за слабеење. Доколку се слушнат двете видеа ќе се види и дека во лажното видео е изменет гласот на Тодорова, за да изгледа како таа да зборува. Изменет е и гласот на водителот на вестите на Канал 5. Дополнително, нивниот говор како да е пишуван со помош на Гугл транслејт, што дополнително отвора сомнеж за вистинитоста на видеото. Измамничкото видео е споделено на Фејсбук страница која има околу 1,5 илјади следбеници и која во делот за информации содржи линк до португалска веб страница на која има неколку текстови за вежбање. Фејсбук страницата има само неколку објави и тие се принтскринови од португалската веб страница. Очигледно е дека станува збор за измама и поради тоа објавата која ја анализираме ја оценуваме како невистина. Извор: Новинска агенција МЕТА
