Надлежно за издавање на лиценци за кабаре е Министерството за економија и труд. Од ова Министерство се почнува и таму се завршува. Но, за да се издаде лиценцата потребно е неколку други институции да дадат одобренија дали објектот може да биде кабаре. Постапката почнува така што барателот на лиценца треба да е трговско друштво, трговец поединец запишани во трговскиот регистар, а може и да е физичко лице.
Лиценцата се бара врз основа на член 20 од Законот, по што до Министерството, , според членот 21, барателот треба да достават неколку документи. И тоа: Дека фирмата е регистрирана во Централниот регистар, одлука за определување на висната на надоместокот за кабаре донесена од советот на општината, пријава за исполнување минимално – технички услови за вршење угостителска дејност и согласност од органот на државната управа надлежен за работите од областа на внатрешните работи дека се исполнети условите за заштита на јавниот ред и мир и безбедност на сообраќајот
Клучно за давање на лиценцата е исполнување на минималните технички услови. Ова е регулирано во членот 6 од Законот, каде стои дека објектот мора да исполнат и санитарно здравствени услови, услови за заштита при работа, заштитата и унапредување на животната средина, противпожарна заштита и услови за заштита од бучава пропишани со закон. Дополнително, треба и согласност од МВР дека се исполнети условите за заштита на јавниот ред и мир и безбедноста во сообраќајот.
Со ова постапката, но и контролата станува мултиресорска. Според Законот, дали некој објект ги задоволува условите од правилникот за минимални технички услови треба да утврди Државниот пазарен инспекторат кој треба да ги контролира овие услови при работата на кабарето. Санитарно здравствени услови ги пропишува Министерството за здравство, а ги контролира Санитарниот инспекторат, условите за заштита при работа ги пропишува Министерството за економија и труд, а ги контролира Трудовиот инспекторат, заштитата на животната средина ја определува Министерството за екологија, а ги контролира Инспекторатот за животна средина, противпожарната заштита ја пропишува МВР, а ја контролира Дирекцијата за заштита и спасување, а безбедноста во сообраќајот ја пропишува МВР и истото ја контролира.
Откако по службена должност ќе бидат доставени сите овие одобренија, се издава лиценцата.
