Водовод ја заврши 2024 година со загуба од над 1 милион евра!
ВМРО – ДПМНЕ ја зголеми цената на водата за пиење, ама џабе и тоа. Претпријатието не ја закрпи дупката од скоро 62 милиони денари. Само по основ на разликата во цената што ја плаќаат битолчани за водата за пиење, Водовод инкасирал 700.000 евра годишно, но наместо за инвестиции и развој, директорите од ВМРО – ДПМНЕ трошеле пари на гориво, на канцелариски материјали, на спонзорства, интелектуални услуги, адвокатски услуги, дневници за патувања… За останати трошоци од работењето ,што и да значи тоа, лани се потрошени над 10 милиони денари, за агенциски вработувања – 9.400.000 денари, или три пати повеќе од 2023 година. Во исто време, Водовод должи 50 милиони денари на Стрежево, а кон други добавувачи скоро 107 милиони денари.
Овие податоци се загрижувачки не само за вработените во претпријатието кои не ќе можат да си ја добијат чесно заработената плата, туку и за сите жители на Битола и населените места. Прашање на време е кога снабдувањето со вода за пиење ќе биде доведено во прашање, кога ќе секнат чешмите во Битола бидејќи во Водовод нема инвестиции, нема развој, туку само безмилосно трошење на парите.
Почитувани битолчани, СДСМ и надлежните институции како Државниот завод за ревизија и Јавното обвинителство, три години предупредуваме дека во Водовод се случува грабеж, дека се уништува јавното претпријатие. Првиот директор на Водовод после промената на локалната власт, Пеце Милевски, за катастрофалното менаџирање заработи три кривични пријави. Милевски делеше пари за награда на одбрани вработени, патуваше во странство без покритие, предизвика загуби на питка вода оти не го обезбеди резервоарот со вода. Неговиот наследник, Андреј Гинов, продолжи каде што застана Милевски. Единствено нешто што не се промени во овие скоро четири години е односот на градоначалникот Тони Коњановски кон Водовод. Дали заради немоќ да се справи со партиските моќници или заради незаинтересираност, Коњановски одлучи да го жртвува Водовод. Сметката на крајот ќе ја платиме сите граѓани на Битола.
