(ВИДЕО): Јапонските спасувачи три дена се обидуваат да ги извлечат возачот и камионот кои пропаднаа во улицата

Јапонските власти денеска побараа 1,2 милиони луѓе да ја ограничат употребата на вода за да спречат истекување на отпадни води додека спроведуваат операција за спасување на човек кој три дена е заробен во дупка предизвикана од уривање на пат, објави АФП.

 

„Наш приоритет е да го спасиме животот на оваа личност, затоа бараме од граѓаните да се воздржат од каква било несуштинска употреба на вода како капење или перење алишта“, изјави претставник на префектурата Саитама. „Тешко е да не се користи тоалетот, но ве молиме користете што е можно помалку вода“, додаде тој.

   

 

Во соопштението, властите во префектурата Саитама ги повикаа луѓето да се воздржат од „користење на канализациониот систем бидејќи нечистата вода може да се прелее“ и додаде дека „најверојатно ќе биде потребно извесно време за да се обнови канализациониот систем“. Во вторникот наутро, центарот на една раскрсница ненадејно пропадна, создавајќи дупка длабока 6 метри и широка 10 метри, во која останаа заробени камион и неговиот возач. Од вторникот попладне, спасувачките екипи немаат контакт со 74-годишниот маж. Акцијата за спасување беше значително одложена поради нестабилноста на почвата и појавата на втора дупка во близина. До средата навечер, „двете дупки станаа една и со оглед на ризикот од нов одрон или уривање на патот, не можеме да користиме тешка механизација“, изјави претставник на противпожарната служба за АФП.