Иако од Општина Кисела Вода аплицирале на повикот на Владата за капитални инфраструктурни инвестиции и поднеле документација за новата општинска поликлиника, тоа е направено само неколку месеци пред новите локални избори кои треба да се спроведат во октомври годинава. Со други зборови, речиси е невозможно за само неколку месеци до крајот на мандатот на градоначалникот Орце Ѓорѓиевски да се испорача ваков крупен инфраструктурен проект. Градоначалникот на Општина Кисела Вода, Орце Ѓорѓиевски во својата предизборна програма за локалните избори (октомври 2021 г.), вети проект – реализација на нова поликлиника којашто треба да ги опслужува здравствените потреби на граѓаните од оваа општина.
Ветување: Здравствената заштита во Кисела Вода мора да ја подигнеме на повисоко ниво. Недозволиво е во XXI век Општина Кисела Вода да нема поликлиника. За решавање на овој проблем Општина Кисела Вода ќе ја подготви целокупната урбанистичко-планска и градежна документација и ќе ѝ понуди на централната власт да ја изгради. Доколку централната власт одбие, Општина Кисела Вода со сопствени средства, средства од донации и фондови ќе ја изгради и ќе ја предаде на користење на централната власт за управување
[Извор: Платформа „За Кисела Вода гарантираме – Создади нова иднина“ (стр.10); Датум: октомври 2021]
Образложение:
Ова ветување на градоначалникот на Општина Кисела Вода, Орце Ѓорѓиевски е дадено за време на предизборната кампања за локалните избори во 2021 г., а дури на 11 февруари оваа година беше најавена подготовка на проектот за аплицирање и на 2 мај општината аплицираше кај Владата за реализација на овој капитален инфраструктурен проект. Па, оттаму, ова ветување го оценуваме како неисполнето. Ѓорѓевски инаку потекнува од редовите на Унијата на млади сили на ВМРО-ДПМНЕ. На локалните избори во 2017 г. е избран за член на Советот на Општина Кисела Вода, а на наредните локални избори во 2021 тој победи уште во првиот круг со програма во којашто вети повеќе капитални инфраструктурни проекти, меѓу кои и изградба на поликлиника. Оттогаш, односно од почетокот на неговиот мандат досега (15.05.2025) не може да се најде ниту една вест или објава во која се најавува овој проект или каков било прогрес во реализацијата на ветувањето за изградба на поликлиника во Кисела Вода. Таква информација нема ниту на прелистувачот Гугл. Единствена вест што може да се најде на оваа тема е од јули минатата година (Канал 5), кога одговарајќи на новинарско прашање за тоа дали Општината ќе аплицира за 250-те милиони евра што премиерот Христијан Мицкоски ги најави за општините, Ѓорѓиевски изјавил дека се работи на проектната документација за поликлиниката:
Можам да најавам дека сериозно се работи и на проектирање на поликлиника во Кисела Вода. Тоа верувам дека наредната година ќе биде аплицирано од наша страна и конечно граѓаните после толку години во Кисела Вода ќе добијат поликлиника со соодветни услови
Понатаму, од она што може да се види на Општинската веб-страница, поликлиниката повторно се споменува на 11 февруари оваа година кога се најавува подготовка на проектот за аплицирање:
Сакам да истакнам дека иако денес поднесовме шест, до крајниот рок ќе поднесеме уште девет, што значи дека Општина Кисела Вода ќе аплицира со вкупно 15 капитални проекти. Ова се сериозни инвестиции кои ќе остават траен белег врз урбаниот развој на Кисела Вода и ќе обезбедат поквалитетни услови за живот на сите граѓани, изјавил тогаш градоначалникот Ѓорѓиевски.
Како што пишува на општинската веб-страница, меѓу останатите девет проекти кои се во подготовка и со кои ќе се аплицира до крајниот рок е и „Изградба на поликлиника во Кисела Вода“. Речиси три месеци подоцна, на 2 мај, од Општината ја споделуваат веста дека со 6 нови проекти аплицирале на повикот на Владата за капитални инфраструктурни инвестиции.
Последните 6 апликации се доставени во средата, со што се заокружи процесот на аплицирање со серија внимателно подготвени и стратешки значајни проекти. Проектите се насочени кон суштински подобрувања во здравството, образованието, комуналната инфраструктура, сè со цел создавање подобри услови за живот и рамномерен развој на сите делови на општината. Новите 6 проекти за кои се аплицираше се:
1.Поликлиника на ГП 06.01, формирана со урбанистички план согласно член 63 од Законот за урбанистичко планирање
2.Фекална канализација за населбата Бабин Дол, согласно урбанистички план за четврт Ј15.
3.Основен проект за реконструкција на објектот на месната заедница Драчево, КП 8411/1, КО Драчево 1.
4.Основен проект за реконструкција на објектот на месната заедница Пинтија, КП 6377, КО Кисела Вода 2.
5.Основен проект за доградба на спортска сала во ООУ „Кузман Шапкарев“, населено место Драчево, КП 8824, КО Драчево 1.
6.Основен проект за јавно улично осветлување на патот кон манастир Пеленица,пишува во објавата на општинскиот сајт.
Сепак, иако од Општина Кисела Вода аплицирале на повикот на Владата за капитални инфраструктурни инвестиции и поднеле документација за новата општинска поликлиника, тоа е направено само неколку месеци пред новите локални избори кои треба да се спроведат во октомври годинава. Со други зборови, речиси е невозможно за само неколку месеци до крајот на мандатот на градоначалникот Ѓорѓиевски да се испорача ваков крупен инфраструктурен проект. Имајќи го предвид сето ова, неговото предизборно ветување за изградба на современа поликлиника во Кисела Вода го оценуваме како неисполнето.
