Објава на Фејсбук неосновано тврди дека медиумите кај нас не смеат да ги коментираат руските воени успеси во Донбас за да не го налутат „Калето“ (амбасадата на САД) и „Рада“ (Радмила Шекеринска, заменикот генерален секретар на НАТО). Тие, наводно, се толку влијателни, што медиумите се самоцензурираат од страв. Но, медиумите јавуваат и коментираат за тие успеси, некои дури и со некритичко цитирање на руски пропагандистички извори, пренесува Вистиномер. Објава во социјалната мрежа Фејсбук вели:
воените успеси на русите во Донбас нашиве медиуми НЕ СМЕАТ да ги коментираат,ќе го налутат Калето и Рада-ебаве шутраците,шупелките
Ова создава лажен впечаток дека нашите медиуми не смеат да ги коментираат руските воени успеси во Донбас, заради можна казна од „Калето“ (жаргонски назив за амбасадата на САД) и „Рада“ (најверојатно Радмила Шекеринска, заменик генерален секретар на НАТО). Тие, наводно, се толку влијателни, што медиумите се самоцензурираат од страв. Тоа е неточно, а како прв аргумент ќе го наведеме клипот објавен од Слободен печат на 27.12.2023 г., под наслов „Андоновиќ: Русија ја освои стратешки важната капија за Доњецк“, во кој новинарот Дејан Андоновиќ ги коментира борбите во Донбас.
Почнувајќи околу седмата минута на клипот, Андоновиќ вели (цитираме директно и без корекции):
Русија сега бележи некакви напредоци. Видовме дека утринава, Маринка, градот во јужниот дел на Доњецк, ми се чини, се наоѓа стратешки важно место, повеќе од две години го бранеа украинските сили, но Русите го освоија утринава, што се смета за добар, за сериозен стратешки удар врз украинските одбранбени сили.
Некаде околу осмата минута на клипот, Андоновиќ додава:
Русите освоија, повторно ќе кажам, едно добро, едно многу важно стратешко упориште, што веројатно влегува во крајна фаза на целосно отцепување на Доњецк, односно на Донбас, односно Луганск и Доњецк, целосно освојување од страна на Русија.
Тоа не е сувопарно известување од типот дека: таму и таму и тогаш и тогаш се случило тоа и тоа, туку тоа е анализа, коментирање и изнесување на лично мислење, а според Андоновиќ, Русите постигнале важен успех во Донбас, што, веројатно, ќе придонело за нивна целосна победа во регионот. Зошто Андоновиќ не бил цензуриран за ова од „Рада“ и „Калето“? Ако некој инсистира на посвеж пример, еве и клип од Слободен печат од 7.2.2025 г.
Тука повторно настапува Андоновиќ, кој околу втората минута на клипот, вели:
Русија има напредок на фронтовите. Успева да ги освои оние точки, кои ѝ се зацртани и не би навлегувал понатаму околу тоа. Доњецката Област е пред тој Часов Јар кога ќе падне и официјално паѓа сè. И, практично после Луганск, Запорожје и Херсон, Доњецк паѓа
Тука повторно настапува Андоновиќ, кој околу втората минута на клипот, вели:
Русија има напредок на фронтовите. Успева да ги освои оние точки, кои ѝ се зацртани и не би навлегувал понатаму околу тоа. Доњецката Област е пред тој Часов Јар кога ќе падне и официјално паѓа сè. И, практично после Луганск, Запорожје и Херсон, Доњецк паѓа
Андоновиќ тука оди чекор напред од минатиот клип и не само што ги коментира руските успеси и не само што прогнозира целосно заземање на Донбас, туку и на други украински региони. Како тоа ја минало цензурата на „Рада“ и „Калето“? Јасно е дека тие не ги цензурираат нашите медиуми, а тоа е невозможно затоа што слободата на говор и јавното информирање се гарантирани со чл. 16 од нашиот Устав. Можеби некој тоа го смета за „мртво слово на хартија“, но веќе го докажавме дека тоа не е така. Аргумент ни е и тоа што некои наши медиуми дури и навивачки јавуваат за руските воени успеси или можеби некритички користат руски извори, кои се познати по пропагандата.
Пример за таков напис имаме кај A1on.mk, под наслов „Руските сили интензивно напредуваат низ регионот на Доњецк“. Притоа, A1on.mk не се повикале на релевантни светски агенции како Reuters или сл., туку на некаков руски Телеграм-канал Операция Z. Па како е тоа можно ако нашите медиуми се под контрола на „Рада“ и „Калето“? A1on.mk се повикале на тој канал и во друг напис. Тој е полн со руски пропагандистички наративи, па вели дека руските сили „ослободувале“ населени места низ т.н. Донечка Народна Република (ДНР), но таа не е меѓународно призната и тоа е руска окупација на населени места низ Украина (гледано според меѓународното право и резолуциите на ООН ES-11/1 и ES-11/4).
Мора да се каже и дека Русија до ден денес нема контрола над сета Донечка Област, на пр. врз градови како Славјанск, Краматорск и др., иако формално ја има анектирано во целост (на хартија). Тоа е состојбата во Донбас. Ако одиме пошироко низ Украина, Русија нема целосна контрола ни над Запорошката и Херсонската Област, а на 11.11.2022 г. го загуби Херсон, единствениот областен центар, што го зазеде во сеопфатната инвазија. Во февруари-мај 2022 г. Русија беше поразена во битките за Киев и Харков, а на 14.4.2022 г. ѝ беше потопена гордоста на Црноморската флота, крстосувачот Москва.
Украина веќе одамна ја гаѓа Русија, особено Белгород, но и Москва. На 3.5.2023 г. мета на дрон беше дури и Кремљ, а најдалечната е Татарстан (1.200 км). Во август 2024 г. Украинците дури зазедоа дел од Курската област, што е прв упад на странска војска во Русија по 1941 г. и редок случај ненуклеарна држава да заземе територија на нуклеарна држава, а таа до ден денес не може да ги набрка. На крај заклучуваме дека кај нас нема медиумска цензура, ниту од „Рада“, ниту од „Калето“. Објавата е клеветничка и манипулативна, па сосема е оправдано и не е никаква цензура ако се обележи како невистинита.
