Романија 2015, Грција 2023, Босна и Херцеговина и Србија 2024, Северна Македонија 2025. На балканскиот циклус на масовно страдање, чија прапричина е високата корупција, не му се гледа крај. Доколку, додека ги следевте извештаите за катастрофалниот пожар во „ноќниот клуб“ во Кочани, во кој досега се загубени 59 во голем дел многу млади живот – дури 45 од преку 150 од повредените се во тешка состојба и досегашниот биланс е речиси извесно дека не е конечен – ви помине чувството на веќе видено, тоа е затоа што за една многу слична трагедија во соседството своевремено веќе сте слушнале. Во октомври 2015 година, во ноќен клуб во Букурешт, сместен во поранешен индустриски објект што беше исполнет со неколкупати повеќе луѓе од дозволениот капацитет, употребата на пиротехнички средства за време на концерт предизвика пожар што брзо се прошири, пред сè затоа што запалив материјал за изолацијата на таванот бил користен запалив материјал. Во пеколниот хаос што следуваше – клубот имаше само еден влез и излез – 26 луѓе ги загубија животите на лице место, но дури 38 починаа подоцна, поради запрепастувачката индолентност и недостиг на основна хуманост на оние што тогаш управуваа со романската држава, пред сè во нејзиниот здравствен систем. За сето ова во 2019 година беше снимен навистина шокантен документарен филм, насловен „Колектив“.
Заменете ги локациите од претходниот пасус со оние од Северна Македонија и таму имате буквално пресликано сиже на ужасот што го погоди Кочани, во третиот викенд од март. Објектот е едвај подобар од некоја поголема шупа, без соодветна противпожарна заштита и излез за итни случаи; алчните закупци што во објектот натрупале многу повеќе луѓе отколку што тоа било безбедно, ако нешто во тој ќумез можело да се смета за безбедно; бескрупулозните изведувачи и организатори што мислеле дека користењето пиротехнички средства во затворен простор е добра идеја; запалив плафон… Сè до морничаво приближниот број жртви – 64 во Букурешт, досега 59 во Кочани – кој, меѓутоа, веројатно нема да остане таков, со оглед на тоа колку животи сè уште се во опасност. И пред и над сè: корупција. Од оној истиот вид што доведе до уривање на настрешницата на железничката станица во Нови Сад во ноември минатата година, што резултираше со смрт на 15 лица. Многу брзо по поведувањето на истрагата, се покажа дека закупецот на објектот во Кочани, лиценцата за негово користење ја набавил незаконски, односно дека е фалсификувана. Наводниот ноќен клуб лиценцата за работа ја добил во март 2024 година незаконски, но со оригинален печат на Министерството за економија и со потписи на „тогаш надлежните лица“, рече премиерот Христијан Мицкоски – со што го потврди она за што веќе имаше сомнежи: дека Северна Македонија добила своја верзија за случајот „натсрешница“. Мицкоски не брзаше тукутака да ја соопшти информацијата кога е издадена фабрикуваната дозвола. Конзервативната ВМРО-ДПМНЕ победи на изборите во мај минатата година, а владата што ја предводи ја презеде функцијата во јуни;
Фалсификуваниот документ му бил издаден на закупецот на зградата во Кочани во времето на претходната владејачка партија, сега предводена од опозицискиот Социјалдемократски сојуз на Македонија (СДСМ). Според тоа, целта е да се насочи гневот на јавноста кон СДСМ, а не кон актуелната власт. Гнев што неминовно ќе експлодира (рушењето на кафуле во сопственост на истиот сопственик и по некој превртен автомобил во центарот на Кочани веројатно се само увертира за тоа) откако ќе помине првичниот шок и неверување за трагичната загуба на толку многу штотуку започнати животи. Овде е невозможно да не се забележи повеќекратната горчлива иронија. Од една страна, нема многу смисла да се излезе на улица за да се протестира против корупцијата на поранешната власт, а сегашната токму на тоа да смета. Од друга страна, ако некој во Северна Македонија е синоним за безгранична системска корупција, тогаш тоа е токму ВМРО-ДПМНЕ во не така далечната ера на поранешниот премиер и бегалец од законот, Никола Груевски. А повторно, ете сега оваа партија е во ситуација да го расчистува смртоносниот хаос во државата, за чие создавање толку многу придонесе и самата. Во истрагата првично беа опфатени 23 лица, меѓу кои и поранешниот министер за економија. За дел од нив е побаран притвор, додека некои други се меѓу хоспитализираните. Мицкоски ветува дека никој нема да ѝ избега на правдата без разлика на партиска или етничка припадност. Романија 2015, Грција 2023, Босна и Херцеговина и Србија 2024, Северна Македонија 2025. На балканскиот циклус на масовни страдања, чија прапричина е високата корупција, не му се гледа крајот.
