Протестна прошетка „Кампањата на насилство мора да престане!“ ќе се одржи денеска во градови низ Србија во знак на поддршка на универзитетската заедница поради се почести закани, вербални и физички напади врз нејзините членови, јави дописникот на МИА од Белград. Таа акција ќе се одржи откако вчера на протест во Ниш беше нападната и повредена со нож деканката на Филозофскиот факултет на Универзитетот во Ниш, Наталија Јовановиќ. Протестот почнува во 19 часот во градови низ Србија и е организиран од Бунтовничкиот универзитет, Слободниот универзитет во Нови Сад, Слободниот универзитет во Ниш и Слободниот универзитет во Крагуевац.
Собирот пред Рекоторат на Студентскиот плоштад во Белград започнува во 18 часот и 45 минути. Колоната ќе се движи по неколку улици во центарот до Републичкото јавно обвинителство. Во Нови Сад, протестната прошетка ќе започне во 19 часот од кампусот, а ќе се движи до плоштадот на Слободата. Во Ниш ќе има протести пред зградата на Основниот суд, а во Крагуевац пред Палатата на правдата. Проширената ректорска управа на Универзитетот во Белград побара итна реакција од надлежните институции по нападот на деканката на Филозофскиот факултет во Ниш и преземање мерки што ќе обезбедат спречување на насилства врз членовите на академската заедница и граѓаните на мирните протести, бидејќи таквото насилство води „кон отворена репресија“. Според нив, тој чин на насилство треба да се гледа во контекст на атмосфера „создадена со клевети, навреди, закани и притисок од високи јавни функционери и таблоидни медиуми“.
„Веќе предупредивме дека континуираните вербални напади во јавноста, на кои особено е изложен ректорот на нашиот универзитет, претставуваат чекор кон отворена репресија, но и создавање амбиент што практично поттикнува насилство врз студентите и професорите“, се вели во соопштението.
Проширената ректорска управа на Универзитетот во Белград бара „да престане говорот на омраза, што може да доведе до трагични последици“ и бара од институциите „да преземат мерки за утврдување на одговорноста на медиумите“ и поединците кои „преку своите јавни настапи влијаат на поттикнување нетолеранција и конфликт во општеството и вршат притисок врз судството, а со тоа ја загрозуваат безбедноста на граѓаните“.
