Најмалку 24 Палестинци се убиени во две одделни израелски воздушни напади синоќа, вклучително и напад врз училиште што засолнувало раселени семејства во централна Газа, според медицински лица и претставници на Цивилната заштита, пренесува Би-Би-Си. Училиштето „Фахми Ал-Џаргави“ во Газа Сити било засолниште за стотици раселени лица од градот Бејт Лахија, кој во моментот е под интензивен напад од израелската армија. Портпарол на Цивилната заштита во Газа, управувана од Хамас, изјави дека биле извлечени 20 тела, вклучително и деца – многу од нив биле тешко изгорени, откако огнот зафатил две училници претворени во живеалишта. Израелската војска (ЦАИ) соопшти дека метата била „команден и контролен центар на Хамас и Исламски Џихад“. ЦАИ тврди дека областа се користела „од терористите за планирање… напади врз израелски цивили и војници“, и го обвини Хамас дека ја користи „популацијата на Газа како жив штит“. „Секаде имаше пламеници. Видов изгорени тела на земја“, рече Рами Рафик, жител кој живее спроти училиштето, во телефонски разговор со Би-Би-Си. „Мојот син се онесвести кога ја виде ужасната сцена.“
Видео-снимки објавени на интернет прикажуваат големи пожари што зафаќаат делови од училиштето, со вознемирувачки сцени од тешко изгорени жртви, вклучително и деца, како и преживеани со критични повреди. Локалните извештаи наведуваат дека меѓу загинатите е и Мохамад Ал-Касих, шеф на истраги во полицијата на Хамас во северна Газа, заедно со неговата сопруга и деца. Непосредно пред нападот врз училиштето, друг израелски воздушен напад погоди дом во центарот на Газа Сити, при што загинаа уште четири лица, соопшти Министерството за здравство управувано од Хамас. Двата напади се дел од поширока израелска офанзива која се засили во северниот дел на енклавата во последната недела. Израелски напад уби девет деца на гата лекарка Во петокот, израелски напад врз домот на палестинска лекарка во Газа уби девет од нејзините десет деца. Единаесетгодишниот син на д-р Алаа ал-Наџар е повреден, исто како и нејзиниот сопруг Хамди ал-Наџар, кој е во критична состојба. Деветте деца – Јахја, Ракан, Раслан, Џебран, Ева, Ривал, Сајден, Лукман и Сидра – биле на возраст од само неколку месеци до 12 години. Израелската армија соопшти дека случајот е во фаза на разгледување.
Во меѓувреме, Црвениот крст соопшти дека двајца нивни вработени се убиени при напад врз нивниот дом во Кан Јунис во саботата. Убиството на Ибрахим Еид, офицер за контрола на оружје, и Ахмад Абу Хилал, чувар во полската болница на Црвениот крст во Рафах, „укажува на неподносливата бројка на цивилни жртви во Газа“, соопшти Меѓународниот комитет на Црвениот крст (МКЦК), повторувајќи го повикот за прекин на огнот. ‘Ситуацијата е очајна’ – Би-Би-Си се враќа кај бебе во Газа оставено гладно поради израелската блокада Во неделата, поднесе оставка директорот на контроверзна организација одобрена од САД и Израел, која се обидуваше да користи приватни фирми за испорака на хуманитарна помош во Газа. Во соопштение од Хуманитарната фондација за Газа, извршниот директор Џејк Вуд рече дека станало очигледно дека плановите за поставување на дистрибутивни центри нема да ги исполнат „хуманитарните принципи“ на независност и неутралност. Израел наметна целосна блокада на Газа на 2 март, која траеше 11 недели, пред да дозволи ограничена помош да влезе во територијата поради предупредувања за глад и растечко меѓународно негодување.
Израелскиот воен орган Когат соопшти во саботата наутро дека 388 камиони со помош влегле во Газа од понеделник наваму. ОН велат дека е потребна многу поголема помош – од 500 до 600 камиони дневно. Во меѓувреме, 20 земји и организации се состанаа во Мадрид во неделата за да разговараат за прекинување на војната во Газа. Шпанскиот министер за надворешни работи Хозе Мануел Албарес повика на ембарго за оружје кон Израел доколку не ги запре нападите. Израел ја започна воената кампања во Газа како одговор на нападот на Хамас од 7 октомври 2023 година, при што околу 1.200 лица беа убиени, а 251 други беа земени како заложници. Според Министерството за здравство на територијата, од тогаш во Газа се убиени најмалку 53.939 луѓе, вклучително и најмалку 16.500 деца. Извор: Новинска агенција МЕТА
