Осомничениот припадник на личното обезбедување на премиерот во саботата се сретнал со неповикано лице – сведок во постапката и му покажал службени документи на МВР кои претставуваат службена тајна. Обвинителството тврди дека осомничениот го сторил делото со цел да прибави паричен износ од 50.000 евра. Јавното обвинителство за гонење организиран криминал и корупција соопшти дека е донесена наредба за спроведување истрага против припадник на Единицата за лично обезбедување на Претседателот на Владата на Република Северна Македонија, кој се сомничи дека од користољубие сторил кривично дело Оддавање службена тајна. Осомничениот припадник на личното обезбедување на премиерот во саботата се сретнал со неповикано лице – сведок во постапката и му покажал службени документи на Министерството за внатрешни работи (МВР) кои претставуваат службена тајна. Обвинителството тврди дека осомничениот го сторил делото со цел да прибави паричен износ од 50.000 евра. „Притоа му дозволил на сведокот истите да ги снима, кажувајќи му кој документ за што се однесува. На овој начин, осомничениот од користољубие, а со цел да бидат објавени на социјалните мрежи, сторил достапни службени документи што претставуваат службена тајна, со цел да прибави паричен износ од 50.000 евра од лицето за кое се однесувале документите“, се вели во официјалното соопштение на Јавното обвинителство. Од таму додаваат дека судот го прифатил предлогот на обвинителството и на осомничениот му определил мерка притвор во траење од 30 дена. „За ова кривично дело предвидено и казниво по член 360 од КЗ е предвидена затворска казна од најмалку една година“, велат од Јавното обвинителство. Од таму напомнуваат дека ниту лицата, ниту документите во овој предмет не се поврзани со лицата и групата од Грчец, како што во текот на вчерашниот и денешниот ден објавија дел од медиумите. Извор: Новинска агенција МЕТА
