Фестивалот ќе обедини над 2.500 млади спортисти од европскиот континент, а ќе се одржи од 20 до 26 јули во Скопје, Куманово и Осиек, Хрватска. Летово во Скопје и Куманово ќе се одржи Европскиот младински олимписки фестивал – ЕМОФ Скопје 2025, кој ќе претставува најголемиот мултиспортски настан што досега се одржал во Македонија. Фестивалот ќе обедини над 2.500 млади спортисти од европскиот континент, а ќе се одржи од 20 до 26 јули во Скопје, Куманово и Осиек, Хрватска.
Повеќе од 900 волонтери ќе бидат ангажирани во различни области и ќе имаат можност одблиску да бидат дел од ЕМОФ, а со тоа да стекнат нови искуства, вештини и пријателства. „Улогата на волонтерите опфаќа сè – од организација на спортските натпревари, пречек и водење на делегации, поддршка во медиумски активности, до создавање пријатна и инспиративна атмосфера за сите посетители. Тие ќе бидат првото лице на Скопје што ќе го сретнат младите спортисти од цела Европа“, велат организаторите на Европскиот младински олимписки фестивал. Организацискиот комитет на ЕМОФ Скопје 2025 веќе го објави повикот за волонтери, нудејќи им можност на сите заинтересирани лица да станат дел од ова историско случување. Пријавувањето се врши на овој линк. „Секој што има желба да биде дел од овој настан може да се пријави и да стане клучен дел од тимот што ќе го претвори фестивалот во незаборавно искуство за сите учесници. Волонтирањето е одлична можност за млади луѓе, студенти, љубители на спортот и сите што сакаат да придонесат кон голем меѓународен проект и да ја претстават Македонија како одличен домаќин“, велат од организацискиот комитет на ЕМОФ Скопје 2025. Извор: Новинска агенција МЕТА
