Почитувани припадници на ромската заедница, Ми претставува особена чест и задоволство, во име на Собранието на Република Северна Македонија и од мое лично име, најсрдечно да Ви го честитам 8 април – Меѓународниот ден на Ромите. Овој ден е посветен на одбележување на богатата култура, уникатната традиција и долгата и значајна историја на ромскиот народ ширум светот. Истовремено, овој ден служи и како важен потсетник за сите нас за неопходноста од поголема социјална инклузија, еднакви можности и почитување на човековите права за секој граѓанин.
Ромската заедница со својата култура, јазик, музика и обичаи дава огромен придонес за културниот и општествениот живот во нашата држава. Таа е важен и нераскинлив дел од нашето заедничко наследство, кое го прави нашето општество побогато и поразновидно. Како претставници на граѓаните, имаме обврска и одговорност континуирано да работиме на унапредување на правата и положбата на ромската заедница, обезбедувајќи еднакви можности и услови за достоинствен живот на сите наши сограѓани. Нашиот заеднички стремеж треба да биде општество каде што различностите се почитуваат, каде секој поединец има можност да го достигне својот целосен потенцијал и каде што сите ние живееме во слога, почит и меѓусебно разбирање. Нека овој празник нè обедини во идејата за праведно и еднакво општество и нека биде поттик за сите нас да продолжиме да работиме со уште поголема посветеност кон подобра иднина за сите. Среќен Меѓународен ден на Ромите!
Со искрена почит,
Африм Гаши
Претседател на Собранието на Република Северна Македонија
