Информацијата за тоа дека германскиот државјанин е во близина на селото Блаце, на планината Скопска Црна Гора, во правец кон селата Брест и Танушевци ја добил дежурниот во АМСМ кој потоа ги известил службите. Германски државјанин кој се изгубил на планината Скопска Црна Гора е успешно пронајден во координирана акција на Авто мото сојузот, Министерството за внатрешни работи и Центарот за управување со кризи. Како што соопшти утринава ЦУК, изгубениот 70 годишен германски државјанин, кој зборувал и на турски јазик, немал македонски телефонски број и прво за помош се јавил во Германската служба за помош на пат која се јавила во АМСМ, по што почнала акцијата за негово спасување која успешно завршила.
Германскиот државјанин бил лоциран во близина на селото Блаце, на планината Скопска Црна Гора, во правец кон селата Брест и Танушевци. Како што соопшти ЦУК, тој прво заглавил на планински пат со неговото возило „тигуан“, па продолжил да се движи пешки кон некоја куќа која ја забележал во далечината додека се стемнувало, на околу 15-тина километри оддалеченост од него. Но, по пат се изгубил и се јавил за помош во Германија. Во акцијата за негово пронаоѓање учествувале и полицајци од полициските станици Мирковци и Танушевци и надлежни од Општината Чучер Сандево. Потрагата по изгубеното лице завршила синоќа околу 19.30 часот.
