Руските медиуми јавуваат за голем хакерски напад кој го нарушил работењето во банкарските системи, платните системи и мобилните мрежи во земјата, а особено се погодени нафтените компании. Како што објави порталот Економска правда, утрово клиенти на многу банки се пожалиле на проблеми со плаќањето, а имало и проблеми со системот за брзо плаќање. Според првичните информации, најлоша е состојбата во Лукоил, чии вработени не можеле да се логираат на своите компјутери. Наместо тоа, како што известува медиумот База на Телеграм, мнногу луѓе ги дочека „чудна порака на екранот“ која изгледаше како сајбер напад.
На сите вработени им е укажано да не се логираат на работните сметки додека не се реши ситуацијата, за да се спречи протекување на податоци. Ura.ru пренесува дека нападот се случил и во друг нафтен гигант, Роснефт, чии вработени биле пречекани со порака со иста содржина како и во Лукоил. „Од вработените се бара да ги исклучат своите компјутери и да не ги користат корисничките имиња и лозинките на нивните деловни сметки до дополнително известување“, пишуваат тие. Русија, исто така, се соочи со хакерски напад минатиот викенд, кога услугите на интернет провајдерот Ловит беа прекинати низ Москва и Санкт Петербург. Меѓу другото, жителите на некои згради не можеа да влезат во своите домови бидејќи системите за домофон беа оневозможени, а деловните субјекти во погодените згради пријавија дефекти во терминалите за плаќање и програмите за лојалност.
