Поротата во петокот пресуди во корист на поранешниот голман на американскиот фудбалски клуб Портланд тимберс, Џејк Глисон (34) од Нов Зеланд во неговата тужба против лекарот на клубот. Спорот против Ричард Еделсон, обвинет за лекарска грешка за време на операцијата за која Глисон рече дека стави крај на неговата кариера, беше изведен на тринеделно судење. – Ова беа шест и пол години чекање правдата да биде задоволена за она што се случи за време на првата операција. Како хирург, кога ќе се збркате, а потоа ќе се обидете да го прикриете, треба да преземете одговорност – рече Глисон. Глисон го тужеше Еделсон за 25 милиони долари (23 милиони евра) поради трошоците за досегашното и идно лекување, изгубени и намалени идни приходи и претрпени болки и страдања.
Поротата му додели отштета од над 20,6 милиони долари (18,5 милиони евра). На Глисон му беа дијагностицирани стресни фрактури на двете потколеници во текот на летото 2018 година, за што беше потребна операција. Неговите адвокати тврдат дека Еделсон не ја стерилизирал правилно ортопедската плоча што ја ставил во ногата на Глисон, откако за време на операцијата сфатил дека му недостасува плоча и ја набавил однадвор. Тие тврдат дека неправилно стерилизирана плоча предизвикала инфекција која барала бројни дополнителни операции на двете нозе, со што на крајот завршила кариерата на Глисон. Поротата едногласно утврди дека Еделсон бил несовесен затоа што користел ИУСС (IUSS), или таканаречената „брза стерилизација“ и не го известил пациентот за тоа. Единаесет од дванаесетте поротници заклучија дека невниманието на Еделсон е причина за повредите на Глисон и дека лекарот исто така бил невнимателен затоа што не открил што ја предизвикало штетата.
