Крива Река се соочува со сериозно загадување, резултати од анализите покажуваат дека водата е неупотреблива за каква било намена. Овие анализи, спроведени од Институтот за јавно здравје и акредитирана лабораторија на барање на риболовното друштво „Мрена“ и Општина Крива Паланка, откриваат шокантни информации, соопшти денес градоначалникот на Крива Паланка Сашко Митовски на прес конференција. Тој рече дека е потребна итна реакција на надлежните институции, нагласувајќи дека резултатите од испитувањата се исклучително загрижувачки. „Анализите покажуваат дека водата во Крива Река е класифицирана во најлошата, V класа на загаденост, што укажува на тоа дека е токсична и не може да се користи под никакви околности“, изјави Митовски.„Според добиените резултати, концентрацијата на олово во водата достигнува 36,65 микрограми на литар, што е речиси четири пати повисоко од максимално дозволеното ниво. Концентрацијата на кадмиум е повеќе од 20 пати над дозволената граница, а присуството на манган и цинк е исто така загрижувачки. Матноста на водата изнесува 170 NTU, што е значително над дозволените 10, а суспендираните материи се над 7.876 микрограми на литар – повеќе од 120 пати над дозволеното“ изјави Митовски.
Митовски ја постави под сомнение официјалната изјава на компанијата „Булмак 2016“, која управува со рудникот „Тораница“. „Не е јасно како компанијата може да тврди дека хаваријата во нивниот рудник нема никаква врска со загадувањето, кога анализите недвосмислено покажуваат присуство на метали што се користат во нивниот производствен процес“, истакна тој. Општината Крива Паланка веќе поднесе кривична пријава, а градоначалникот побара од Јавното обвинителство итно да реагира. „Очекуваме институциите да реагираат соодветно и без одлагање, за да се спречи натамошна еколошка катастрофа“, додаде тој. Локалните еколошки организации предупредуваат на сериозните последици од загадувањето по биодиверзитетот и водниот екосистем. Тие упатуваат повик за итни мерки, нагласувајќи дека ако не се преземат дејства, Крива Река може да стане мртва река.
