Во галеријата „Art Project Space“ во грчкиот главен град Атина отворена е меѓународната групна изложба со жени-уметници од Македонија, Грција, Србија и Кипар, под наслов „Скриеното трето: Некаде помеѓу присуството и отсуството“. Изложбата е организирана од Националната галерија, во соработка со галеријата „Art Project Space“ и ќе биде отворена до 6 јуни. Како што беше најавено на вчерашното отворање, во октомври, изложбата ќе биде презентирана на македонската публика, а делата ќе бидат изложени во Мултимедијалниот центар Мала станица. Македонската промоција е планирана од 2 до 25 октомври. Кураторки на изложбата се д-р Ана Франговска, кустос советник во Националната галерија на Р.С. Македонија и независната историчарка на уметност од Грција Ники Папаспиру.
„Изложбата се развива долж имагинарна оска што се протега од Белград до Никозија, со Скопје и Атина како клучни точки во оваа геополитичка и културна поврзаност. Тринаесетте македонски, грчки, српски и кипарски уметнички ќе претстават дела во медиуми како што се просторни и звучни инсталација, видеа, објекти, слики, цртежи и перформанс. Изложбата создава феминистички простор на соживот, отпор и прекомпонирање, потенцирајќи ја важноста на уметничкиот израз во постојано променливиот свет“, се вели во соопштението на Националната галерија. Учеснички на изложбата се Слободанка Ступар, Аница Вучетиќ, Дарија С. Радаковиќ, Анита Аргироилиопулу, Ефи Фурики, Катерина Евангелаκу, Моника Мотеска, Вана Урошевиќ, Дијана Томиќ, Славица Јанешлиева, Клица Антониу, Марина Касианиду и Елина Јоану.
„Скриеното трето претставува проширување на проектот Присутност/Отсутност, формирајќи мрежа на дијалог помеѓу женски уметнички гласови од Балканот и Медитеранот. Инспирирана од теоријата на Басараб Николеску за меѓусебно поврзана и повеќеслојна реалност, изложбата го третира „скриеното трето“ како средишна сфера на постоење каде спротивставените поими коегзистираат и се трансформираат: присутност/отсутност, материјално/нематеријално, индивидуално/колективно“, потенцираат од Националната галерија. Изложбата е проследена со тројазичен каталог.
