Гугл претстави повеќе од 100 новитети на настанот „Google I/O“, што е јасен знак дека технолошкиот гигант има намера да доминира во секој аспект од вештачката интелигенција – од целосната реорганизација на Пребарувањето до најновите ВИ модели и технологија за носливи уреди, пренеува Бизнис Инсајдер. Настанот беше преполн и, на многу моменти беше и возбудлив. Гугл презентираше импресивни статистики за тоа колку нивниот AI напреднал. Имаше и доста амбициозни цели, како создавање на универзален AI асистент и XR (проширена реалност) очила кои даваат насоки во реално време. I/O, исто така, ги откри и слабостите на Гугл. Некои од објавите се преклопуваа, а ривалот OpenAI во среда ја засени Гугл со своја голема најава. Сега кога конференцијата заврши, еве ги шесте главни поенти:
Гугл сака „целосна реорганизација“ на пребарувањето Најголемата промена што беше најавена на I/O беше AI Mode — што извршниот директор Сундар Пичаи го нарече „целосна реорганизација“ на најиконичната функција на Гугл. Со AI Mode, корисниците ќе добијат многу поконверзациско искуство при пребарувањето, поставувајќи директни прашања до Гугл за тоа што бараат. Тоа е голема промена во однос на традиционалното прелистување низ долги листи на линкови за да се најде одговор, што сега делува застарено во ерата на AI четботи. Сепак, овие AI функции потенцијално можат да го поткопаат пребарувањето на Гугл и да ја загрозат главната машина за приходи – Google Ads. Постои ризик Гугл да не најде начин за сериозно монетизирање на овие алатки. Сепак, веќе тестира реклами во AI Mode. Gemini насекаде
Семејството AI модели на Гугл, Gemini, беше во центарот на вниманието на I/O. Гугл најави дека ќе го интегрира Gemini во Chrome, овозможувајќи им на корисниците да разговараат со најновите AI модели додека сурфаат. (Оваа функција ќе биде достапна за претплатници летово.) Тоа е директен удар кон ChatGPT од OpenAI, кој веќе има популарна екстензија за Chrome. I/O исто така претстави низа ажурирања за Gemini апликацијата, која неодамна надмина 400 милиони активни корисници месечно — импресивна бројка, но сè уште зад ChatGPT. Со ажурирањето „Personal Context“, корисниците ќе добиваат одговори приспособени според лични податоци од Google сервиси, на пример да го прашаат AI да најде одамна изгубен имејл. Сето тоа е дел од долгорочен план за создавање универзален AI асистент: проектот на Гугл наречен Project Astra. Иако сè уште не е завршен, планот сега изгледа многу поразвиен отколку пред една година. Силен подем на AI функциите Новите AI функции се неспорно импресивни, но она што доби најсилна реакција за време на говорот на Пичаи беше обемот на користење. Пичаи откри дека бројот на генерирани токени преку сите платформи на Гугл се зголемил 50 пати — достигнувајќи над 480 трилиони месечно. Публиката воздивна — тоа беше голем момент. Минатогодишниот I/O изгледаше како најава за идни функции, со многу ветувања но малку реални резултати. Оваа година беше поинаку.
Сергеј Брин се враќа во „основачки мод“ Најјасниот знак дека Гугл тројно вложува во AI беше појавувањето на коосновачот Сергеј Брин на разговор со извршниот директор на DeepMind, Демис Хасабис. Претходно, Брин беше забележан како шета по павилјонот и пробува XR очила од Гугл. Во разговорот, Брин рече дека „практично секој ден“ оди во канцеларија за да работи на AI. Исто така повика пензионирани компјутерски научници да се вратат на работа за да го искористат моментот. Брин се врати во Гугл уште во 2023 година, како дел од трката со ривалите во AI, и очигледно е дека е во „основачки режим“ — нешто ретко кај голема, зрела компанија. Паметните очила на Гугл се тука — на некој начин Гугл му дозволи на Business Insider кратко да ги проба своите прототип XR очила базирани на Android, кои вклучуваат Gemini AI функции и можат да одговараат на прашања. Иако технологијата ветува, сè уште е во рана фаза. Персоналот на Гугл ги предупредуваше посетителите да не прашуваат за цена, достапност или траење на батеријата. „Едноставно, не знаеме!“, рекоа. Очила се исклучително лесни — дури премногу, како да ќе паднат од лицето. Дисплејот се појавува само на десното стакло и е речиси невидлив, освен ако не се гледа под точен агол и светлина. Има целосна боја, но е толку суптилен што лесно може да се промаши.
Не ни беше дозволено да ги користиме Google Maps или Photos како што беше прикажано во презентацијата. Наместо тоа, се шетавме низ просторија со уметнички слики и туристички каталози, за кои можевме да му поставуваме прашања на Gemini. Иако успешно ги идентификуваше уметничките дела, не можеше да одговори на едно просто прашање за патување: „Кој е најевтиниот лет до Њујорк следниот месец?“ А бидејќи дисплејот е само од една страна, гледањето во него предизвикуваше благо укрстување на очите. Оваа верзија не е финален дизајн. Сè уште недостига стилот од брендови како Warby Parker и Gentle Monster, но се гледаат почетоци на нешто ветувачко. Ќе успее или не? Објавите на Гугл се неспорно импресивни, но дел од нив беа повторливи. Тешко е да се разликуваат Search Live и Gemini Live – и двете се однесуваат на разговор со телефонот за тоа што го гледа преку камерата. Стратегијата на Гугл да лансира буквално 100 различни работи одеднаш може да им донесе успех. Но може и да укаже на недостаток на фокус. Business Insider беше присутен на еден панел на I/O кога се прошири веста дека OpenAI го купува хардвер стартапот на поранешниот дизајнер од Apple, Џони Ајв. Тоа што OpenAI го засени Гугл изгледаше злокобно. Панелот на Гугл што го посетивме беше технички и сув, полн со термини како „AI-поддржано повикување алатки“. Контрастот со енергичната објава на OpenAI беше очигледен. Видовме неколку посетители како веднаш ги проверуваат своите телефони. Гугл има огромна предност во скалабилност и дистрибуција, благодарение на Android и Chrome. Но на долг рок, можно е некој уред кој е целосно AI-нативен и воопшто не зависи од екосистемот на Гугл — да го преземе водството. Инвеститорите почувствуваа вкус на тој ризик минатиот месец, кога акциите на матичната компанија Alphabet накратко паднаа откако високиот потпретседател на Apple, Еди Кју, изјави дека обемот на пребарување опаѓа поради AI. Извор: Новинска агенција МЕТА
