Скопје, 13 мај 2025 – На 11 мај на Школка во Градски парк се одржа настанот „Гуш и бац е љубов“, традиционално по шести пат. Тоа беше вистинска прослава на детската љубопитност, пријателство и инклузија. Во организација на Здружението „Аутизам ААМК“, стотици деца од различни возрасти и развојни карактеристики учествуваа во низа едукативни, креативни и забавни активности што придонесоа за развој на емпатија, разбирање и прифаќање. Настанот прерасна во инклузивна игротека каде преку игра, музика, уметност и едукативни работилници, децата имаа можност да учат едни за други и да развиваат чувство на заедништво. Концептот е дечињата да си дојдат, да има за сечиј интерес по нешто, да се изнаиграме, да се дружиме, добиваат печатчиња и на крајот ги радуваме со мали подарочиња за спомен.Заедничкото учество во креативни активности покажа дека различностите не се пречка, туку богатство што треба да се слави.
Од активности имаше креативно катче, забно катче, шминки и фризури, вежбање карате, шах, играње „Не лути се човече„, ликовно катче, полигон, сложувалки, фитнес, играње со алки, музичко катче, фудбал, домино, играње плочка, куглање, играње со топки, со лак и стрела, прескоци, тенис, кошарка, пантомима, магични залчиња, играње „Икс – Нула„,лего коцки, возење велосипед и тактилно катче. На сцената на Школка настапија Илина и Јована, ученици од школата на Андријана Јаневска, Марија Савеска, Дени Жерновска, ученици од основните училишта „Петар Поп Арсов„, „Блаже Конески„„Вера Циривири Трена„, „Аврам Писевски„, ученици од училиштето за деца со оштетен вид „Димитар Влахов„, женскиот хор „Фрида„, хорот на „Златно славејче„, Мила Николовска, Димитар Иваносски, Мијата, Космонаутко и сите славејчиња. Имавме и прекрасно обраќање од Амела и Леон.
Одзивот од над 100 волонтери на настанот „Гуш и бац е љубов“ сведочи за силната поддршка од заедницата и довербата во мисијата на Здружението „Аутизам ААМК“. Овие волонтери се амбасадори на инклузијата и клучен ресурс за идни активности, покажувајќи дека постои подготвеност за ширење на инклузивната култура во општеството. Нивната ангажираност го потврдува потенцијалот за организирање на уште поголеми и повлијателни настани. Волонтерите беа составени од индивидуалци, експерти, дефектолози, психолози и припадници на Црвениот крст и Волонтерски Центар Скопје. Меѓу волонтерите имаше и фотографи како и сниматели кои веќе изработуваат видео кое ќе ја долови вистинската вредност на настанот. Организаторите со радост и нетрпение исчекуваат да го споделат со бескрајна благодарност до креаторите.
„Она што го видовме денес беше навистина инспиративно – децата не гледаат бариери, тие гледаат другари со кои сакаат да играат и да растат. Овој ден беше доказ дека со малку разбирање и отвореност, сите можеме да создадеме поинклузивно општество,“ велат од Здружението „Аутизам ААМК“. „Континуираното приклучување на се повеќе поддржувачи секоја година е јасен показател дека сѐ поголем број компании и организации ја препознаваат важноста на инклузијата и активно учествуваат во нејзиното градење. Нивната поддршка не е само финансиска, туку и морална порака дека сите деца заслужуваат еднакви можности за среќно и исполнето детство. Од срце им благодарам за нивното влијание и несебичен придонес во создавањето на инклузивно и хумано општество – нивната поддршка значи светлина и надеж за многу семејства.“ – изјави Денис Јанкуловски.
Настанот покажа дека инклузијата започнува од детството, и дека преку вакви собири можеме да градиме општество во кое секое дете се чувствува прифатено, почитувано, вреднувано и сакано. Настанот „Гуш и бац е љубов“ веќе го направи првиот чекор кон регионално проширување со учество на фестивали во Прилеп и Крушево во 2024 година, покажувајќи дека инклузијата може и треба да се шири низ целата земја. Во наредните години, стратегијата вклучува градење едукативна платформа, посилни партнерства со институции и трансформирање на настанот во мултидневен фестивал на инклузија. Вмрежувањето со здруженија од регионот дополнително ќе го зацврсти влијанието и ќе ја прошири пораката за прифаќање и заедништво на пошироко ниво.
